Son ja dobèrtas las inscripcions pel DCL en occitan de l’acadèmia de Montpelhièr. Aquel examen que certifica la competéncia de la lenga se debanarà a Nimes lo 27 de mai. Vos podètz inscriure en linha sul sit del DCL fins al 29 de març.
 
Lo DCL es la sigla de diplòma de competéncia en lenga, e se tracta d’un examen oficial de l’estat francés que servís per certificar las competéncias de la persona examinada en occitan, e en un dotzenat de lengas. L’espròva simula una situacion de la vida vidanta ont lo participant deu jogar un ròtle. Après escotar d’àudios, veire de vidèos e parlar al telefòn, l’examinat resolverà una situacion e ne farà un rapòrt. Lo resultat de l’espròva decidirà qual es lo nivèl de competéncia, dins lo quadre europèu de referéncia, dels nivèls A1 fins a C1.
 
Los govèrns regionals prenon normalament en carga una partida de las despensas d’inscripcion. Tocant Lengadòc-Rosselhon, podètz demandar mai d’informacions a Marie-José Villeneuve, qu’es l’encargada de mission per l’ensenhament de l’occitan dins l’acadèmia de Montpelhièr. Aquel organisme prepausarà lèu una preparacion a l’examen.