Bandièra01 1180x150: Comuna de Tolosa

Actualitats

Atac de Charlie Hebdo: qual son los dessenhaires, los policièrs e los autres mòrts?

Lo masèl a la redaccion del setmanièr francés Charlie Hebdo, al centre de París, a daissat dotze mòrts, dont cinc dessenhaires de la publicacion e dos policièrs. 


Los dessenhaires
 
Stéphane Charbonnier, dich “Charb”, nasquèt en 1967 en Conflans-Sainte-Honorine, en Illa de França. Aviá trabalhat a l’Écho des Savanes, a Télérama e a d’autras publicacions, abans de venir lo director de Charlie Hebdo en 2009.
 
Jean Cabut, dich “Cabu”, nasquèt en 1938 a Chalons-en-Champagne, en Champanha. Dessenhava dempuèi sos setze ans, que ja comencèt de publicar sos dessenhs. Foguèt un dels fondadors de la revista Hara-Kiri. Pendent los ans 1970 e 1980, participèt a de programas de television per enfants, a l’encòp contunhèt sa carrièra de caricaturista en divèrsas revistas. En febrièr de 2006, sus la primièra pagina d’un numèro de Charlie Hebdo, signada per Cabu, apareissiá Maomet en plorant amb lo títol: “Maomet aclapat pels fondamentalistas”, çò que generèt una fòrta controvèrsia.
 
Philippe Honoré, conegut coma “Honoré”, nasquèt en 1941 a Vichèi, en Occitània. Comencèt de publicar de dessenhs de premsa dins sos 16 ans, per lo quotidian occitan en lenga francesa Sud-Ouest. Tanben collaborèt amb un grand nombre d’autres jornals, coma Libération, Lire o Les Inrockuptibles... Forniguèt d’illustracions a de libres de totas menas, en particular faguèt de dessenhs de cobèrta per la colleccion Petits Classiques de l’editor Larousse.
 
Bernard Verlhac èra nomenat “Tignous”, una escritura a la francesa del nom occitan “Tinhós”. Aquel subrenom li veniá de sa grandmaire occitana, segon Le Monde, que lo nomenava aital, e Verlhac ne faguèt son pseudonim. Nasquèt en 1957 e comencèt de publicar sos dessenhs dins la premsa al començament dels ans 1980. Abans de trabalhar a Charlie Hebdo aviá trabalhat a Marianne e Fluide Glacial.
 
Georges Wolinski nasquèt en 1934 en Tunisia. Publiquèt los primièrs dessenhs dins lo setmanièr Rustica en 1958. En 1960 se jonguèt a la còla d’Hara-Kiri. Contribuiguèt a L’Humanité, Le Nouvel Observateur e París Match, entretant. Foguèt director de Charlie Hebdo entre 1970 e 1981.
 
 
Los policièrs
 
Ahmed Merabet e Franck Brinsolaro son los noms dels dos policièrs mòrts en l’atac de Charlie Hebdo.
 
Franck Brinsolaro, marselhés, èra l’escòrta de Charb, e poguèt pas empedir l’atemptat. Aviá 49 ans e èra adscrich a la seguretat personala del director del setmanièr menaçat dempuèi l’an 2006, en seguida d’un atac amb bomba.
 
Ahmed Merabet se trobava dins la zòna dels faches e afrontèt los atacants quand fugissián. Foguèt ferit pel còp de fuòc que li tiraron de luènh e èra tombat al sòl. Las feridas l’empediguèron de se mòure e de se defendre. Una camèra enregistrèt lo moment qu’un dels tuaires acabava de lo tuar a boca de canon. Aquel filmet, qu’a virat per lo Mond, lo volèm pas publicar dins lo Jornalet pel respècte de la dignitat d’Ahmed Merabet. Merabet fasiá partida del comissariat del districte XI de París, a la brigada ciclista. Aviá 42 ans e èra maridat. Segon Rocco Contento, secretari departamental del sindicat Unité SGP Police, Merabet èra representant del personal del comissariat.
 
 
Las autras personas assassinadas
 
Frédéric Boisseau, òme d’ostal, emplegat de Sodexo per netejar lo local del jornal.
 
Elsa Cayat, psicanalista e cronicaira.
 
Bernard Maris, dich “Oncle Bernard”, economista occitan e cronicaire.
 
Mustapha Ourad, corrector.
 
Michel Renaud, organizaire occitan del festenal Rendètz-Vos del Quasernet de Viatge de Clarmont-Ferrand (Rendez-Vous du Carnet de Voyage de Clermont-Ferrand). Èra invitat a la redaccion lo jorn de l’atemptat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article