Bandièra01 1180x150: Comuna de Tolosa

Actualitats

De grècs demandan qu’Alemanha torne los prèstes concedits de fòrça pendent la guèrra

Alemanha deuriá a Grècia 11 miliards d’èuros per un prèst que lo país ellenic foguèt forçat de concedir pendent la Segonda Guèrra Mondiala, e que jamai seriá pas estat remborsat

| Scheerer / Archiu Federal d'Alemanha
En Grècia, un comitat d’audit a remés un rapòrt al Ministèri de las Finanças qu’afirma qu’Alemanha deu a Grècia 11 miliards d’èuros per un prèst que se concediguèt de fòrça pendent la Segonda Guèrra Mondiala, e que jamai seriá pas estat remborsat, segon çò que rapòrta lo jornal bèlga Express.be.
 
Grècia foguèt conquistada e ocupada per las armadas alemanda e italiana a la prima de 1941. L’ocupacion durèt tres ans e mièg. Panagiotis Karakousis, president del comitat de verificacion e èx-director general del Tresaur grèc, indica que los ocupants alemands exigiguèron un prèst d’1,5 miliard de dracmas de la Banca Nacionala Grèga. En mai d’aquò, encara segon Karakousis, aquela demanda a pas cap de ligam amb las reparacions que Grècia las poiriá reclamar pels damatges ocasionats per las armadas ocupantas alavetz, e que poirián èsser de qualques desenats de miliards d’èuros.
 
 
162 miliards d’èuros
 
162 miliards d’èuros: aquò seriá exactament aquela chifra, sens comptar los interèsses comolats. Es la quantitat qu’a calculada Manolis Glezos, eròi de guèrra grèc e actual deputat de Syriza al Parlament Europèu. Glezos quitament precisèt qu’Alemanha a ja tornat de prèstes d’aquel tipe a l’èx-Iogoslavia e a Polonha, mas pas jamai a Grècia, e que los deu tornar al títol dels prèstes forçats e extorquits pendent l’ocupacion.
 
De son costat, Alemanha afirma que deu pas res a Grècia. Martin Jäger, pòrtavotz del Ministèri alemand de las Finanças, a precisat que “setanta ans après la fin de la guèrra, la question de las reparacions a perdut sa legitimitat. Vesèm pas cap de basa a una demanda tala”, çò diguèt, en tot far referéncia a la Convencion de 1960 per donar un aspècte juridic a sa responsa.
 
Segon Express.be la guèrra en Grècia faguèt 1,4 milion de mòrts e de ferits, çò es aperaquí lo 19% de la populacion grèga totala. Al delà, 70 000 josieus grècs foguèron menats dins de camps de concentracion que practicament cap d’eles i subrevisquèt pas. De mai, 130 000 ciutadans foguèron executats. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Xesc Ciutat de Mallorca
1.

Los nazis amb l'ajuda des feixistes italians invadiren mataren 1.600.000 grecs e ara diuen que ja fa 70 anys e que volen pas saber res. Ni pagar los 11 miliars d'euros que los nazis robare al govern grec. Esperem que Sirisa els faci pagar fins lo darrer centim a aquesta colha de Na Merquel & company.

  • 1
  • 0

Escriu un comentari sus aqueste article