Bandièra01 1180x150: Comuna de Tolosa

Actualitats

L’estat espanhòl a aprovat la preson a perpetuitat

Lo nòu còde penal tanben prevei la preson per la resisténcia pacifica a las manifestacions

Lo parlament a aprovat una reforma del còde penal qu’inclutz, entre divèrsas mesuras, la preson a perpetuitat, nomenada eufemisticament “preson permanenta revisabla”. Los partits de l’oposicion critican d’aspèctes inconstitucionals e considèran qu’es una lei injusta que demenís los dreches mas que protegís pas los ciutadans. Aquela proposicion de lei deu passar ara al Senat.


Lo Congrès espanhòl dels Deputats aprovèt dimècres passat, solament amb los vòtes del Partit Popular, una reforma del còde penal qu’inclutz, entre diferentas mesuras, la preson a perpetuitat, nomenada eufemisticament “preson permanenta revisabla”. Lo govèrn espanhòl ditz qu’aquela condemnacion a perpetuitat se poirà solament aplicar dins los cases d’assassinats grèus coma lo magnicidi (es a dire l’assassinat del rei, del prince eiretièr o d’un cap d’estat) o coma la mòrt de menors de 16 ans, l’assassinat precedit de violament o los delictes de terrorisme.
 
La lei compren tanben de mesuras contra la corrupcion. Per exemple, los condemnats per corrupcion auràn pas drech a la libertat condicionala se tornan pas l’argent qu’an pres a las arcas publicas. Las penas per corrupcion venon mai duras e lo finançament illegal dels partits politics ven un delicte.
 
Ça que la, los partits de l’oposicion an criticat aquelas mesuras anticorrupcion perque las considèran tròp feblas.
 
 
Consentiment sexual als setze ans, maridatge a partir dels catòrze
 
La nòrma aumenta als setze ans l’edat de consentiment per las relacions sexualas, mas òm se pòt maridar a partir dels catòrze ans, amb lo consentiment dels parents.
 
La proteccion de las victimas de la violéncia masclista se veirà refortida, e s’establís de delictes nòus coma lo maridatge forçat, lo secutament sexual e la difusion d’imatges intims sens consentiment. En mai d’aquò, s’adapta la nòrma europèa sus la pornografia infantila, l’esplecha sexuala e la tracha de las femnas.
 
 
Se punís la resisténcia pacifica
 
Aquela reforma elimina del còde penal çò que fins ara èra considerat coma de “fautas”. Ara totes los faches punibles seràn considerats coma de delictes. Se punís la resisténcia pacifica en las manifestacions, un delicte que s’apond al d’atemptat e de desòrdre public dins lo cas d’incidents amb la polícia.
 
Aquò es la 28a reforma del còde penal espanhòl e punís pel primièr còp lo maltractament, abandon e esplecha sexuala dels animals. Prevei tanben de penas e de sancions pels promotors dels combats de cans e de gals.
 
La nòrma enduresís las sancions per produire de materials qu’inciten a l’òdi e la violéncia per de rasons de raça, sèxe, orientacion sexuala, religion o origina nacionala, e tanben per aver de material destinat a la violéncia o l’umiliacion d’aqueles grops.
 
 
Amnestia Internacionala i vei una “grèva reculada per la libertat d’expression”
 
Amnestia Internacionala a criticat durament aquela reforma penala. Dins un comunicat assegura que se tracta d’“una grèva reculada per la libertat d’expression e de reünion” perque dificulta aqueles dreches e evita los crimes de drech internacional. La reforma —çò dison— aumenta las penas e de delictes contra los manifestants “sens cap de justificacion”, e ditz coma exemple lo fach que se considèra ara fòrça mai grèu lo delicte contra l’autoritat quand se produtz dins lo contèxt d’una manifestacion, e punís amb preson la resisténcia pacifica. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Xesc Ciutat de Mallorca
1.

A aquesta lei li queda pauc temps, aprés de las elecions la treuran. Segurament ni s'arribarà a aplicar a ningú.

  • 1
  • 0

Escriu un comentari sus aqueste article