Los Gats-Fèrs de Wakefield tenián d’urpas plan cortas aqueste dissabte a Brutús per poder èsser en mesura de contrar los Dracs. Davant 9_000 espectators, tre la tresena minuta, lo centre Dupòrt liberava la pauma per son alièr Damian Blanch que marcava. A la 20ena, Steva Menzies interceptava la pauma dins sos 20 mètres e sa corsa volontària lo menava darrièr la linha britanica. Los Angleses redusisián la marca en fòrça per Ali Lauitititi, mas Steve Menzies replicava sul pic.

 

Amb las transformacions de Scott Dureau, la marca èra de 18-6 a la pausa. E encara: Grèg Monís tombèt una pauma al moment de marcar!

 

Fasiá una calorassa estivenca sus Perpinhan e los paures Angleses i perdián lo buf e l’eime.

 

Tre la represa, Eloi Pelissièr recuperava una candèla de Leon Pryce e mandava Clint Greenshields a l’ensag. Lo temps d’engatjar e Wakefield marcava son segond ensag per Kyle Trout.

 

La dominacion catalana se concretizava per dos novèls ensags de l’alièr Damien Blanc. Fin finala, los Dracs l’empòrtan 34-10 e confirman lor tresena plaça al general. Se trapan a un punt dels seconds: Warrington.

 

E per la jornada que ven, lo diluns 9, van justament a Warrington: aquò promet!!

 

Cortetas: o Scott Dureau, Steve Menzies e Darryl Millard fan part de la pre-seleccion dels Exiles, l’equipa dels jogaires dels Antipòdis de al Super-Liga que rescontrarà l’Anglatèrra aqueste dimècres a Huddersfield. Los Angleses fan virar lor efectiu per una revista dels pretendents en vista de al Copa del Monde de al atrdor de 2013.

 

A Carcassona, òm arrèsta pas de festejar las victòrias e los titres de l’equipa primièra de l’ASC XIII, dels joves de la MJC e tanben de Vilagalhenc-Argon e Vilanòva-de-Menerbés. Atal, dimars a Domèc (19 h), las equipas reçaupràn los diplòmes oficials e dijòus (19 h) serà recepcion oficiala al Castèl de Vilaulin pel Conselh general.

 

Lo dissabte 23 de junh al Barcarès (Païses Catalans), l’equipa de las Aglas anglesas (seleccion dels jogaires de la 1èra division amator) s’es impausada aisidament fàcia a una seleccion de Federala de Lengadòc-Rosselhon: 60-20.

 

L’equipa de França de XIII-fautuèlh disputarà una partida contra Anglatèrra lo 27 d’agost a Londres en dobertura dels Jòcs paralimpics.

 

Bona novèla al plan mediatic: La cadena BeinSport es ara disponibla sul satellit via CanalSat (sul canal 97). S’i pòt seguir partidas dels Dracs, rescontres de Super-Liga e de la NRL australiana.