Bandièra01 1180x150: Comuna de Tolosa

Actualitats

Marginalizadas demest los marginalizats: las femnas bantos de Somalia son discriminadas “dins totes los aspèctes”

Un rapòrt de Minority Rights Group e de l’IIDA amassa de desenats de testimoniatges de la marginalizacion femenina dels grops subaltèrnes dins la Somalia actuala. Las femnas bantos relatan la discriminacion economica e educativa amb los insultes e secutaments que subisson. Entre lo 15% e lo 20% de la populacion de Somalia aperten a qualque grop etnic non somali.


Las femnas apertenent a las minoritats son expausadas a una “dobla discriminacion” en Somalia, çò que las afècta en “practicament totes los aspèctes de lors vidas”. Çò ditz un rapòrt qu’an fach amassa Minority Rights Group (MRG) e una de las associacions de femnas mai importantas de Somalia, l’IIDA. Lo rapòrt reclama a las autoritats somalis e a la rèsta del Mond que priorizen la “proteccion e l’integracion de las femnas de las minoritats”.
 
Contra la percepcion —fòrça estenduda— que Somalia es un país etnicament omogenèu, las donadas de divèrsas fonts especializadas estiman qu’entre lo 15% e lo 20% dels abitants d’aquel país apertenon a de grops non somalis. Demest eles, las populacions d’origina banto son las mai nombrosas e las que, segon l’estudi, patisson una discriminacion pièger. Los bantos de Somalia se concentran al sud del país, e fòrça d’eles son de descendents d’ancians esclaus. Parlan lo mushunguli e d’autras lengas del grop banto.
 
 
Testimoniatges de violéncia e discriminacion
 
L’MRG e l’IIDA an amassat los testimoniatges de desenats de femnas bantos e d’autras minoritats —en i comprenent de grops etnicament somalis mas tradicionalament discriminats pr’amor que se consagran a certans mestièrs— que relatan los insultes, los secutaments e las marginalizacions economicas e educativas quotidianas que patisson elas o lors enfants. Una dobla marginalizacion: pel fach d’èsser bantos, e pel fach d’èsser de femnas.
 
“La marginalizacion” d’aquelas femnas, çò ditz lo rapòrt, s’estend “de l’accès a l’assisténcia umanitària fins a la santat e l’educacion, en passant per las oportunitats de trabalh o de subsisténcia”. Atanben, las femnas qu’apertenon als grops minorizats “son mai que mai vulnerablas a d’abuses coma las agressions sexualas, los violaments en grop e d’autras formas d’esplecha”.
 
Aqueles faches son mai que mai grèus dins un país que patís dempuèi mai de vint ans un conflicte armat continú. Fòrça d’aquelas femnas, segon l’estudi, vivon “en de camps de desplaçats o en d’installacions urbanas informalas”, e son sovent lo cap de familha pr’amor que lors parents o marits —se cal remembrar que Somalia es una societat fòrça patriarcala— son mòrts, en mantes cases a causa de la guèrra. Per aquelas femnas, “las oportunitats de trabalh o de subsisténcia son paucas, e son limitadas sustot a de trabalhs manuals fòrça mal pagats”.

 
 
 
 
 


Aquesta nòva es adaptada de Nationalia amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernest Galtés i torras Igualada (PP.CC.)
2.

Les dones son maravelloses, sense elles non som res, en que pensen els que els fan això?

  • 1
  • 0
Eric Moul
1.

Triste constat. Baste que dure pas...

  • 1
  • 0

Escriu un comentari sus aqueste article