Bandièra01 capçalera  1180x150: Novestivada

Actualitats

“Las alternativas son dins los nòstres pòbles”: los movements socials prepausan las lors tòcas a Rio+20

Un instant de l'Amassada dels Pòbles, a Rio de Janeiro
Un instant de l'Amassada dels Pòbles, a Rio de Janeiro

L’Amassada dels Pòbles revendica un nòu paradigma mondial basat sus “lo drech a la tèrra e al territòri, a la vila, a l’environament e a l’aiga, a l’educacion e a la cultura”. Lo document final reclama que i aja un “contraròtle popular e democratic” dels “bens comuns e energetics”.


De movements socials e d’organizacions de pertot dins lo mond s’amassèron fa doas setmanas a Rio de Janeiro (Brasil) a l’Amassada dels Pòbles Rio+20 per la Justícia Sociala e Environamentala, un encontre alternatiu a l’amassada oficiala dels estats, la Conferéncia de las Nacions Unidas sus lo Desvolopament Sostenable, mai coneguda coma Rio+20. Segon l’organizacion, l’Amassada dels Pòbles mobilizèt  30 000 personas cada jorn, e 80 000 manifestèron per las carrièras de Rio de Janeiro.
 
A la declaracion finala, liurada al secretari general de las Nacions Unidas, Ban Ki-moon, l’Amassada dels Pòbles critiquèt l’actuala “crisi mondiala”, provocada, segon la lor opinion, pel capitalisme neoliberal associat “al patriarcat, al racisme e a l’omofobia”. Dins aquel encastre, çò ditz lo tèxt, “las corporacions transnacionalas contunhan de cometre los sieus crimes, coma la sistematica violacion dels dreches dels pòbles e de la natura”.
 
“Las alternativas” a aquò, çò ditz encara lo document, “son dins los nòstres pòbles, dins la nòstra istòria, dins las nòstras costumas, coneissenças, practicas e sistèmas productius”, çò qu’es vist coma l’embrion d’un “projècte contraegemonic e transformador”. Dins aquel nòu paradigma, los pòbles reclaman “lo drech a la tèrra e al territòri, a la vila, a l’environament e a l’aiga, a l’educacion e a la cultura”, entre d’autres, e “vòlon determinar per qué e per qui se destinan los bens comuns e energetics, al delà d’assumir lo contraròtle popular e democratic de la lor produccion”.






Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article