Bandièra01 1180x150: Comuna de Tolosa

Actualitats

A començat un macrojutjament en Turquia contra mai de 200 personas ligadas al movement curd

Demest los jutjats i a Ragıp Zarakolu, activista turc qu’a trabalhat plan a la defensa dels dreches umans e dels dreches dels pòbles minorizats e que lo prepausèron ongan al prèmi Nobel de la Patz
Demest los jutjats i a Ragıp Zarakolu, activista turc qu’a trabalhat plan a la defensa dels dreches umans e dels dreches dels pòbles minorizats e que lo prepausèron ongan al prèmi Nobel de la Patz | Front Line Defenders

Los jutjats son acusats d’associacion illegala per mejan del KCK, que l’Estat turc considèra coma lo braç urban del PKK. Un militant pels dreches umans e una professora universitària son entre los acusats. Lo partit curd BDP qualifica lo jutjament de “masèl politic” contra lo movement curd. Lo PEN Club Internacional e Reportaires sens Frontièras critican l’ofensiva judiciala.


Turquia comencèt diluns passat a jutjar 205 personas acusadas d’aperténer a l’Union de las Comunitats de Curdistan (KCK, segon las siá sigla en curd), una organizacion curda que l’Estat turc acusa d’èsser lo braç urban de la guerrilha independentista del PKK. Dins lo procès se jutjarà de desenats de membres del Partit de la Patz e de la Democracia (BDP, segon la siá sigla en curd), la formacion que representa los interèsses de Curdistan dins lo Parlament de Turquia.
 
Tanben se jutjarà de personas notablas de la vida academica e associativa de Turquia. Entre aqueles noms i a Ragıp Zarakolu (activista turc qu’a trabalhat plan a la defensa dels dreches umans e dels dreches dels pòbles minorizats e que lo prepausèron  ongan al prèmi Nobel de la Patz), Büşra Ersanlı (professora l’Universitat de Marmara e conselhièra del BDP en drech constitucional) e Ayşe Berktay (traductritz e militanta pels dreches umans). Los tres intrèron a la preson en octòbre de 2011, mas Zarakolu foguèt liberat en abril passat.
 
 
Criticas d’organizacions internacionalas
 
Lo PEN Internacional, qu’obsèrva los eveniments de plan près, s’es mostrat preocupat per las consequéncias del jutjament e a soslinhat que lo procès a levat un fum de voses criticas que lo percebon coma un “atac contra los jornals, los jornalistas, los escrivans, los editors e los avocats amb de simpatias curdas”. Dins una linha similara, Reportaires sens Frontièras considèra que lo jutjament cèrca de “criminalizar la libertat d’expression”.
 
Del sieu costat, la copresidenta del BDP, Gültan Kışanak, a dich, segon Firat News, que lo jutjament es “un masèl politic” contra lo movement curd. La cap del BDP considèra que lo sieu partit patís una “repression de lei marciala” mas que contunharà, ça que la, de defendre lo drech “de far de politica democratica”.
 
Lo jutjament comencèt amb una fòrta polemica lingüistica, segon çò qu’explica Reuters. Lo tribunal refusèt la demanda dels avocats dels curds de dispausar d’interprèts per que los jutjats pòscan parlar en la lor lenga. Un dels avocats, Ercan Kanar, a dich que la proïbicion de parlar lo curd al tribunal supausa “lo refús del drech uman mai elementari: parlar e se defendre dins la lenga qu’òm parla melhor, la lenga mairala”.






Aqueste article ven del jornal catalan Nationalia.cat, amb qui Jornalet a un acòrdi de cooperacion. 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article