Bandièra01 1180x150: Comuna de Tolosa

Actualitats

Egipte a bombardat l’Estat Islamic en Libia en responsa al masèl de 21 còptes

Las autoritats de Libia confirman la mòrt d’un cinquantenat de milicians de l’Estat Islamic

L’armada egipciana ataquèt diluns de matin divèrsas milícias plaçadas en Libia que serián leialas a l’Estat Islamic (EI). Egipte las ataquèt en responsa a l’assassinat d’un vintenat de còptes dimenge passat en mans d’aqueles jihadistas. Segon l’estat major de la Fòrça Aeriana de Libia, l’armada egipciana a tuat aperaquí 40 o 50 milicians de l’EI. Dins un comunicat, l’armada egipciana soslinha que los atacs se son debanats en complissent una resolucion del Conselh de la Defensa convocat pel president egipcian, Abd Al Fattah As Sisi, après la difusion del vidèo de l’assassinat del vintenat de còptes egipcians.
 
Aquel comunicat tanben rapòrta que los bombardaments se produguèron “contra las casèrnas, las posicions, los luòcs de concentracion e d’entraïnament e los magazins d’armas” dels jihadistas leials a l’EI dins lo territòri de Libia, e que l’atac a acomplit la tòca “amb exactitud”. L’armada egipciana avertís qu’aquò “es una responsa a las accions criminalas de las organizacions terroristas dins e fòra lo país, e mai es una venjança del sang egipcian e una punicion dels assassins”.
 
 
Assassinat de vint e un còptes
 
L’atac se produguèt l’endeman que l’EI revendiquèsse un vidèo de cinc minutas mostrant l’assassinat de vint e un crestians còptes egipcians, capturats en Libia en decembre e genièr. Lo vidèo —que lo publicarem pas per respectar la dignitat de las personas assassinadas— mòstra coma sagatan las victimas agenolhadas sus la plaja. Un dels assassins, cotèl en man, parla a la camèra abans lo crime salvatge e ditz: “la seguretat per vosautres, crosats, es una causa que solament la podètz desirar”.
 
Al mitan d’aquela situacion, lo president francés François Hollande e son omològ egipcian Abd Al Fattah As Sisi an demandat una reünion d’urgéncia al Conselh de Seguretat de l’ÒNU. Lo govèrn egipcian denóncia que, sens una intervencion ferma per aturar la progression de las organizacions terroristas en Libia, los radicals representaràn una menaça per la patz internacionala.
 
De lor costat, los Estats Units an condemnat lo masèl dels còptes e l’an qualificat d’acte mespresable. Jordania a demandat a la comunautat internacionala mai d’engatjament per combatre l’Estat Islamic. Mentretant, França, qu’a tanben condemnat las decapitacions dels crestians egipcians, a vendut 24 avions de combat a Egipte del modèl Rafale. Es lo primièr còp que França reüssís a exportar aquel tipe d’avion a l’estrange.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
5.

#4 Se tuèt Gadafi per qu'aguèsse pas l'escasença de parlar, que n'aurià poscut dire de duras e de maduras sus qualques dirigents o ex-dirigents occidentals.

  • 3
  • 0
Francesc Ciutat de Mallorca
4.

La cia mata a Gadafi després d'una longa guerra amb l'ajuda dels islamistas, ara hi a Libia los que posaren las potències occidentalas. Gadafi era molt milhor que aquestes criminals musulmans extremistas que matan los catòlics coptes. Cal donar-los branca, encara que sia tard. Branca !

  • 3
  • 1
Terric Lausa Quilhan
3.

Aqueste matin, a la fornariá de pan , mon vesin çò me disiá: "Es plan fèit per lhor gula".

  • 2
  • 0
antalya apraquital
2.

#1 pfff vai t'en demandar als còptes te diran çò que ne pensan sens bricas de discors convengut e fals !

  • 6
  • 0
Lachaud Dornazac
1.

Quand las armas parlan, i a pus ren a dire. La França vai daus avions e los djiadistes fabrican daus mòrts.
mas, perque en esser arribat aqui?
I aguet 200ans de colonisacion européena, seguida per lo neo-colonialisme e la guera americana.
La patz auria polgut se far emben una decolonisacion pacifica mas i aguet lo petròl.
Tot aquò nos rapela nòstra responsabilitat européena. Avem semnenat la dominacion, la guera, e obtengut l'apocalipse.
Uei, la patz nos apela. Devem reconeisser nos tòrts e damanda perdon per los tòrt qu'avem causats. Alaidonc las victimas poran a lòr torn pardonar sens p'una idéia de rancunha.
D'acord i a los tòrts materiaus mas i a los tòrts de nòstra esser dau dedins que van pesar de mai en mai fòrt sur l'umanitat e sur nòstra consciença.

  • 4
  • 7

Escriu un comentari sus aqueste article