Bandièra01 capçalera  1180x150: Botiga

Actualitats

Turquia: de fremas turcas en colèra

En Turquia, l’assassinat d’una estudianta lo 13 de febrier passat a relançat lo debat sus la condicion de la frema dins aqueu país musulman laïc

| Cevdet Cevdet
Lo divendres 13 febrier de ser, Özgecan Aslan, una jove estudianta de Mersin au sud de Turquia, se’n tornèt a casa amb un minibús, mejan de transpòrt en comun fòrça utilizat dins aqueu país. Se retrobèt soleta just abans d’arribar a l’ostau, es a aqueu moment que lo menaire dau bus decidiguèt de s’arrestar, abans de sonar son paire per l’ajudar a violar la joventa. Quand sa victima assagèt de resistir, lo menaire o suportèt pas e li donèt de còps de cotèu mortaus abans de li copar lei mans, de la cremar e de la getar dins un riu. Es l’assassinat de tròp per una partida de la societat turca, que manifestèt son sosten pendent mai d’un jorn. Lei coupables foguèron arrestats mai fauguèt una granda pression populara per que la justícia turca, sota l’influéncia dau govèrn islamista, considerèsse una pena a l’auçada de l’acte.
 
En Turquia, e mai encara a l’èst dau país, lei jutges an pas per costuma de condemnar seriosament leis agressions còntra lei fremas. Pasmens, lo fenomèn es pas negligible e va creissent. Dempuei que l’AKP es au poder, lo murtre de frema a aumentat dau 1400%. Per 2014 soncament, 325 fremas foguèron tuadas, la mitat per son marit que, dins lo 20% dei cas, se vengèt d’una demanda de divòrci. Aquela estatistica pren pas en còmpte lei nombrós actes de violéncia de cada jorn: fremas violadas, batudas ò sexualament secutadas.
 
Una jove responsabla dau partit socialista de l’oposicion CHP a acceptat de respòndre ai questions de Jornalet. Eda Bayraktar, estudianta a Ankara, considèra que “la condicion dei fremas se degrada en Turquia, es una persona de segonda classa perque sei drechs son pas protegits per la lei, en causa de la reduccion dei penas minimalas”. L’ancian primier ministre e actuau president de la Republica, Recep Tayyip Erdoğan, a sa responsabilitat dins aquela situacion. A multiplicat lei declaracions ostilas a l’emancipacion dei fremas. L’an passat, considerèt que “per natura, òme e frema pòdon pas èstre egaus” abans de precisar que “l’islam a definit una plaça per la frema qu’es la maternitat”.
 
Piéger, lei responsables islamistas profiechan de l’assassinat d’Özgecan Aslan per prepausar l’installacion de transpòrts en comun reservats ai fremas, una alternativa que lei feministas turcas refusan de considerar. “Avèm pas de se separar, leis òmes an d’aprene coma se comportar dins una societat civilizada”, nos ditz Eda Bayraktar que confèssa tanben qu’en Turquia, es “fòrça complicat de cambiar l’estat d’esperit dei gents”. Pasmens la militanta socialista demòra optimista per l’avenir de son país. “Lei movements feministas progrèssan dempuei quauqueis annadas e lei fremas en generau considèran que fau despassar aquela egemonia dau mascle”. La lucha còntra lo sistèma patriarcau turc sembla lònga pasmens, entravada per un poder islamista que pauc a cha pauc a desfach leis avançadas dau drech de la frema dau sègle XX.
 
 
 
 
Matieu Casanòva

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Matieu Casa
5.

Merhaba Cevdet,
Bu fotoğrafı facebook'ta buldum, çünkü Eda arkadaşım (Eda koydu).
Bir problem var mi ? bu fotoğrafı çektin ?
Iyi aksamlar

  • 2
  • 0
cevdet Özçelik Bolu/Turkeyrkey
4.

Fotoğrafı kimden alıp kullandınız?
https://www.facebook.com/photo.php?fbid=10205372196800119&set=pb.1104912158.-2207520000.1424982611.&type=3&theater

  • 1
  • 0
antalya apraquital
3.

#2 E lo país onte i a lo mai de "viols" per 100 000 estatjants es ........... La Suède....

Aqui lo ligam :
http://commons.wikimedia.org/wiki/File:Rape_rate_per_100,000_-_country_comparison_-_United_Nations_2012.png

  • 1
  • 0
alèssi tolosa
2.

#1 Çò plan de rementar qu' amai en França la libertat de las femnas e l'egalitat entre elas e les òmis
son pas de causas acquisas , e que l' acara pels dreits de las femnas deu sègre . L'esfòrç deu venir tant dels òmis que de las femnas ,çò deu èsser le projècte de societat de deman...

  • 5
  • 0
antalya apraquital
1.

Aquel murtre faguèc una esmoguda granda a travèrs turquie. Los artistas se mobilizèron, e se vestiron de negre, las associacions dins cada part de la societat, il aguèc manifestacion a istanbul d’òmes vgestits de jupass, e cadun butèc sa crida acarat a-naquèl orre murtre.
L’esmoguda n’es de mai granda qu’aquel afar reverta pas brica las tradicions turcas. Erdoğan de per sa posicioons islamista a l’encontra de las femnas e de tota la societat fuguèc monstrat del det e acusat.

LIgam fòto d’ Özgecan
http://www.haberturk.com/gundem/haber/1046463-ozgecan-aslanin-sembol-olan-fotografinin-hikayesi

Ligam manifestatcions a l’escasença d’aquel orre murtre:
http://galeri.haberturk.com/gundem/galeri/446992-turkiye-ozgecan-aslan-icin-agliyor
http://galeri.haberturk.com/gundem/galeri/446983-ozgecan-aslan-icin-siyah-giydiler

La comunotat turca estajanta a paris :
http://www.aa.com.tr/fr/turquie/469197--rassemblement-a-paris-en-hommage-a-ozgecan-aslan


Pr’aquò aquel afar dèu tanben èsser un convit entà agachar ençò de nosaus , trabaretz un pichon escapolon de d’a còps auriatz doblidat.
Cada an en França 216 000 femnas de 18 fins a 75 ans son las victimas de violenças fisicas e o sexualas de lor companh. Aquel chifra es una estimacion minimala.
Lo nombre de las femnas tiadas en 2013, dins l’encastre del coble es de 129 femnas ( una femna tiada cada 2,8 jorn. Demest las violenças i son tanben los mainatges tiats per un parent o bel parent, son 33 mainatges.

Cada annada en França 86 000 femnas son victimas de temptativa de « viol »
En 2004 53 000 agueron de mutilacions sexualas, nau victimas sus detz an estadas excisadas abans l’atge de detz an.
Ligam : http://stop-violences-femmes.gouv.fr/Les-chiffres-de-reference-sur-les.html

  • 6
  • 0

Escriu un comentari sus aqueste article