Citizen Four, de la realizaira e jornalista estatsunidenca Laura Poitras, a obtengut l’Oscar del melhor documentari. Se tracta d’un filme basat principalament sus l’afar d’espionatge massís de l’Agéncia Nacionala de Seguretat dels Estats Units (NSA), revelat per Edward Snowden en 2013, qu’a l’ora d’ara se tròba refugiat en Russia. Quand reculhiguèt l’Oscar, Poitras mercegèt Edward Snowden “per son coratge”, e tanben “los informators e los jornalistas que descapèlan la vertat”. Lo documentari se pòt veire entièr sus Internet.
 
Poitras Fasiá longtemps que trabalhava sus un filme tocant los programas de seguiment e espionatge dels Estats Units, activats après los atacs de l’11 de setembre de 2001. En genièr de 2013 un inconegut que se fasiá nomenar “Citizen Four” li mandèt un messatge encriptat en li ofrissent d’informacions privilegiadas sus las practicas illegalas d’escotas telefonicas de l’NSA e d’autras agéncias d’intelligéncia.
 
En junh de 2013, Poitras anèt a Hong Kong amb sa camèra per la primièra reünion amb l’inconegut, que s’identifiquèt coma Edward Snowden. Al recontre assistiguèron tanben lo jornalista d’investigacion Glenn Greenwald e lo jornalista d’intelligéncia del jornal The Guardian Ewen MacAskill. Aquò foguèt la primièra reünion entre mantas que Poitras enregistrèt e que son la basa d’aquel documentari.