Euròpa acusa França de respectar pas la Carta Sociala Europèa que França signèt en 1996 e que ratifiquèt en 1999, tocant los castigs fisics vèrs los enfants. Lo Conselh d’Euròpa denoncièt dimècres passat dins la legislacion francesa “l’abséncia d’interdiccion explicita e efectiva de totes los castigs fisics cap als mainatges dins los mitans familial, escolar e dins d’autres encastres”.
 
Las rumors sus la futura sortida d’aquela denonciacion alimentam las discussions politicas. Ja lo govèrn francés a fach saber que fargariá pas cap de lei. La secretària d’estat francesa a las familhas o refusa al motiu de “trencar pas lo país en dos camps: los que son per l’ancada e los que son contra”.
 
Sus 47 estats que son sòcis del Conselh d’Euròpa, una majoritat de 27 an de leis contra los castigs fisics dels enfants dins l’encastre familial. Sens cap de dobte la personalitat del Secretari General del Conselh d’Euròpa, l’ancian primièr ministre norvegian Thorbjørn Jagland, aurà jogat un ròtle de primièr plan dins aquela denonciacion. D’efièch, d’un caire Norvègia es un país abolicionista dels castigs familials dempuèi 1987 e, d’autre caire, En Jagland longtemps foguèt president del Comitat Nobel per la Patz. Es un òme fòrça sensibilizat als dreches umans.
 
França foguèt informada de la decision del Conselh d’Euròpa fa quatre meses coma o preveson las proceduras. Se remarcarà que l’organisme a donat un fòrt resson mediatic a aquel afar en lançar una campanha sul tèma: “Las mans deurián servir per protegir, pas per tustar; levatz la man contra l’ancada”.