Marie-Lys Bibeyran es una femna de Medoc que se bat per que la Mutuala Sociala Agricòla del departament de Gironda reconesca coma malautiá professionala lo càncer que tuèt son fraire Denis en 2009. Denis Bibeyran aviá trabalhat 30 ans coma salariat viticòla al país e subiguèt un càncer de las vias biliàrias, e sa sòrre vòl demostrar qu’es l’usatge dels pesticidas que lo provoquèt.
 
La cambra sociala de la cort d’apelacion de Bordèu a estudiat l’afar aqueste dijòus passat e la decision serà presa en deliberacion lo 16 d’abril, segon las informacions de France Bleu Gironde.
 
Lo paure Denis Bibeyran comencèt sa carrièra d’obrièr viticòla dins sos 14 ans, en Medoc, e pendent 20 ans menèt lo tractor e espandiguèt los diferents tractaments quimics suls rasims. En 2008, quand aviá 46 ans, son mètge li senhalèt que subissiá un càncer. “Sovent en periòde de pulverizacion aviá problèmas coma sagnaments de nas, maus de gòrja, a còps anginas pro sevèras”, çò explica Marie-Lys Bibeyran a France Info. “Me’n remembri de l’aver entenut a díser «a! aquò son dilhèu aqueths produits»”, çò apond.
 
Encara segon aquela ràdio, es pas per l’argent que se bat ela, qu’es davant los tribunals dempuèi cinc ans en tot luchar per aquela reconeissença. Ela es tanben salariada viticòla e planh que “las causas non an pas brica cambiat”. “I a tostemps aquesta ormetà”, çò ditz. A l’ora d’ara, Marie-Lys Bibeyran es militanta dins l’associacion Fitovictimas [Phyto victimes] e espèra una victòria judiciària per que servisca a d’autras familhas.