Bandièra01 1180x150: Comuna de Tolosa

Actualitats

IDECO, l'edicion e la difusion occitanas per excelléncia (?)

Jornada del libre occitan a Sent Orenç, lo 30 d'abril 2012
Jornada del libre occitan a Sent Orenç, lo 30 d'abril 2012 | Mediatèca Occitana

L'Institut d'Estudis Occitans apèra sos aderents benevòles a s'amassar lo 28 de julhet a Rodés per imaginar lo futur de l'edicion occitana.


Despuish mantunas decennias, l'I.E.O. federau assuma una part bèra de l'edicion occitana per lo biais de son sector edicion e difusion: IDECO. Lo catalògue es coneishut per contiéner òbras màgers de la literatura. Uas estón premiadas per lo prèmi Jaufre Rudel coma Lo Viatge Aquitan, de Joan Ganhaire, Trenga & Tampèsta, de Sergí Javaloyés, o mei recentament Diari d'un mes de març, d'Eric Astié. S'i tròban tanben las òbras narrativas Robèrt Lafont (Vida de Joan Larsinhac,...), los Verds Paradis de Max Roquèta, las òbras quasi-complètas de Joan Bodon, traduccions de Garcia-Marquez, lo famós diccionari inacabat de Crestian Rapin,... En dus mòts, tot un patrimòni literària.

IDECO es tanben un utís de difusion hicat a disposicion deus autes editors, sovent associatius, qu'an pas lo mejans fisics de se har conéisher sus un territòri de 190 000 km².
 
Malurosament, despuish quauquas annadas, IDECO semblava se desalenar e s'eslunhar deus autors e deus lectors. Mantuns autors fidèls despuish la creacion s'estiman mei de cambiar de botica. Lo manca de relacion autor/editor, la multiplicacion de las coquilhas, lo non respècte deus delais de publicacions., autant de causòtas que se pòden compréner per un organisme associatiu, mes dont la soma vad lèu indigèsta. Deu costat deus lectors, lo sentit es pas deus bons. Lo site internet, s'es estetic, manca d'ergonòmia. Los libes son classats per genre, puish per colleccion, puish per títols, shens possibilitat de triar per autors, o datas de parucion. Las ficas descriptivas son bracas, shens nat resumit. Los quites autors "istorics" de l'ostau coma Bodon, Micheu Chapduelh, o Ives Roquèta an quitament pas lora fica biografica. Las òbras premiadas son pas senhaladas.
 
Pròche de la catastròfa economica, lo Conselh d'administracion de l'IEO prenó darrerament la decision de barrar un pòste remunerat, çò qu'a haviat discutidas passionadas dens las seccions despartamentaus entre los partisans d'una ideològia de solidaritat associativa e los afogats d'un desvolopament economic en presa dirècta dab las realitats deu mercat liberau. Per anar mei lunh, e reviscolar lo sector, cada membre de l'associacion es convidat a una amassada de refleccion lo dissabte 28 de julhet au matin, a Rodés.
 
Per mei d'informacion, e participar, contactatz lo director de l'I.E.O., Laurenç Gosset.



 
Julí M.-B.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alícia Montpelhièr
1.

"Las realitats deu mercat liberau" ??? Lo mercat liberau es règde en defòra de lei realitats mai realistas, afrabant la màger part de lei populacions deu monde per afartar un part infime, un ponherat de chuca-sang e de manja-susor que ba crèban tot çò mai umanista, culturau e tradicionau, tot çò naturau de per aqueste paure monde. Que nos parlen pas mai d'aquelei putanhièras "realitats deu mercat liberau", pecaire ! Tant vau mai dire "lei règlas autoritàrias de la dictatura financièra internacionala" !!!

E ne crebam, nosautreis ? Signe qu'avèm bèn causit lo bon camp… "Bon cop de falç, defensors de la terra…"

  • 3
  • 8

Escriu un comentari sus aqueste article