Bandièra01 1180x150: Comuna de Tolosa

Actualitats

Hollande e Merkel festejan amassa los 50 ans de la reconciliacion dels lors estats

"Volèm pas donar de leiçons, mas simplament donar exemple", çò diguèt lo president francés en parant la man a Merkel

| Frontera Informativa

Lo president francés, François Hollande, a prepausat un nòu pache d'amistat a la cancelièra alemanda, Angela Merkel, que defend "una Euròpa mai fòrta per sortir de la crisi". Lo costat escur de la jornada foguèt provocat per las profanacions de cavòts de combatents alemands.


Lo president de França, François Hollande, e la cancelièra alemanda, Angela Merkel, s'acampèron ièr dimenge per commemorar lo 50n anniversari de la reconciliacion entre los dos estats. Los dos dirigents son d'acòrdi sul fach que superar la crisi europèa es un prètzfach dur, mas que pòt representar a l'encòp una oportunitat.
 
"Euròpa afronta una granda provocacion que deu superar. L'union economica e politica que se concebèt fa 20 ans es pas encara pro fòrta. La nos cal acabar al nivèl politic. Es un trabalh erculèu, mas Euròpa n'es capabla", çò diguèt la cancelièra.

En un discors prononciat davant la catedrala de Rems, luòc ont en 1962 lo cancelièr Konrad Adenauer e lo General Charles de Gaulle sagelèron oficialament l'amistat entre los dos estats, Merkel a soslinhat que l'airal de l'èuro "pòt sortir mai fòrt d'aquela crisi" se se desmembra pas que se cal manténer jonches.
 
La cancelièra soslinhèt tanplan que la relacion francoalemanda "es pas exclusiva" e convidèt lo rèsta dels païses a s'i apondre "per aténher una Euròpa fòrta basada sus las siás valors comunas, que prenga la plaça que li reven".
 
Del sieu costat, lo cap de l'estat francés a soslinhat que 50 ans après lo gèst simbolic emprés pels mandataris de l'epòca, "la provocacion d'Euròpa es pas mai la siá reconstruccion, mas la siá transicion", als nivèls energetic, industrial o ecologic, entre d'autres. "Partejam una moneda comuna que cal defendre amb de nòrmas e d'espleches potents, amb de politicas coordenadas. L'Union Europèa afronta una provocacion. Es pas la primièra ni serà tanpauc la darrièra, mas pòt supausar un novèl ponch de partença", çò diguèt Hollande.
 
"Volèm pas donar de leiçons, mas simplament donar exemple", çò diguèt lo president a prepaus del ròtle que jògan Alemanha e França. Es pas que los calga imitar, se tracta de "refortir los ligams per èsser mai fòrts amassa".
 
Lo primièr jorn de las commemoracions aguèt un costat negre pr'amor de la profanacion de cavòts dins un cementèri militar situat a Saint-Étienne-à-Arnas, pas gaire luènh de Rems, ont i son enterrats de nombroses soldats alemands mòrts pendent la Primièra Guèrra Mondiala. Segon çò qu’anoncièt lo ministèri de l'Interior, quaranta croses de fusta qu'apertenián a de combatents alemands foguèron raubadas pendent la nuèch, e qualques unas d'elas foguèron emplegadas per alucar un fuòc. Lo ministre, Manuel Valls, condemnèt los faches amb fermetat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alícia Montpelhièr
1.

Alamanha e França vòlon donar d'exemples ? França deu començar per respectar e cooficializar sei lengas e descolonizar sa politica en tèrme de "cultura". Alamanha e França devon començar per rementar ais entrepreneires e autreis trafegant de valors borsièras fumosas, qu'es pas eleis que comandan mas, en democracia per çò mendre, leis elegits dau pòble. Anar dirigits per de mercants de fadesa dona pas exemple a degun, mas vergonha en totei !

  • 1
  • 0

Escriu un comentari sus aqueste article