Bandièra01 capçalera  1180x150: Botiga

Actualitats

Rugbi, jornada 21

A la sortida de la vint e quatau deu Tòp 14, las causas son claras

Los de Tolosa e los de Clarmont son assegurats de jogar directament las semifinaus
Los de Tolosa e los de Clarmont son assegurats de jogar directament las semifinaus | Alexandre Gerard

En haut deu classament coneishem 5 de 6 qualificats per las fasas finaus: los tolosans e los de Clarmont son assegurats de jogar directament las semifinaus, Tolon es en hòrt bona pausicion per finir tresau e arrecéber peus barratges aperats tanben faus quataus de finau. Per la quatau e cincau plaça, plaças quasiment asseguradas a Castras e Montpelhièr, los dus lutaràn per la quatau plaça dab l'objectiu d'arrecéber l'aute a domicili en barratge lo 25 o 26 de mai. A la vint e cincau jornada lo dèrbi de l'Isla de França serà la partida decisiva per conéisher l'adversari de Tolon en barratge.


Dus clubs, Agen e Beglas-Bordèu, que son eliminats de la corradura a las fasas finaus mès quasiment sauvaguardats de la davarada. Que cau sonque tres punts a Agen e shèis a Beglas-Bordèu per estar en Tòp 14 l'an que vien. La partida enter eths a la vint e quatau jornada, que se jogarà a l'estadi Musard de Beglas, serà una hèsta a ne pas mancar per l'UBB. Aqueths an hèit una sason formidabla dab un grop de grana qualitat mès tanben un gran entrenaire Marc Delpoux. L'UBB n'a pas jamèi avut paur de produisir jòc contra tots los adversaris.
 
Per lo baish deu tablèu podèm díser que desempush aquesta jornada qu'es acabada peu club arpitan de Lion. N'an pas sabut préner los punts a la maison aus bons moments au contrari de Beglas.

Que son quate clubs a jogar la davarada en Pro D2. Biàrritz, dab la soa victòria a Lion dissabte passat, a lo calendari mei favorable. Dissabte la partida contra Clarmont serà capitala. Briva a lo calendari mei complicat mès dab lo son jòc e la soa energia pòt préner punts un chic pertot. Sustot que vienen de ganhar un punt hòrt important en çò d'un adversari dirècte: Baiona. An jogat a 14 contra 15 mei de 30 minutas apres l'expulsion de Caminati per un dusau carton jaune. Que serà complicat pr'amor Tolosa, Clarmont e Tolon, los tres adversaris a l'exterior de Briva, ne deisharàn pas trop de punts abans la fin de la fasa qualificativa. Baiona, dab lo son budget de 18 millions d'euros, es la maishanta suspresa de la sason. Mès es normau dab la gestion desastrosa deu club. La partida contra Perpinhan aqueth dissabte de manifestacions per las lengas pòt estar la finau de la davarada. Sustot si Perpinhan perdeish un còp de mei a Aimé Giral. Enqüèra finalista deu Tòp 14 en 2010, lo club catalan n'a pas sabut har los cambiaments necessaris. Com Biàrritz an una carcassa fatigada. Que serà temps au mes de junh de préner lo camin de la retirada après bèth-lèu una sason de tròp.

Eric Goyhenne

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article