Bandièra01 1180x150: País Invisible

Actualitats

crotz-tolosaCreated with Sketch.ProvençaProvençaPreaups de Dinha

Lo copilòt faguèt escrachar intencionalament l’avion, segon l’enquèsta

S’embarrèt dins la gabina, daissèt pas intrar lo pilòt e foguèt conscient fins al darrièr moment

Lo copilòt de l'avion faguèt escrachar l'avion de Germanwings entre Barcelona e Düsseldorf al Pueg del Tres Evescats, çò a explicat fa qualques minutas lo procuraire de Marselha, Brice Robin, qu’es en carga de l’enquèsta. Amb las donadas de l’enregistrament del son de la boita negra que se trobèt lo meteis jorn de l'accident, es arribat a aquela conclusion. Pendent las primièras vint minutas de vòl, los dos pilòts parlavan de manièra normala; puèi lo comandant sortiguèt; lo copilòt prenguèt lo comandament, s’embarrèt dins la gabina, faguèt descendre l’aparelh e foguèt viu fins al darrièr moment que s’escrachèt l’avion.
 
Lo copilòt s’apelava Andreas Lubitz, èra alemand e aviá de vint e uèch ans. Le Monde ne publica un petit retrach.
 
Vaicí l’explicacion de Brice Robin:
 
“Après vint minutas de convèrsa normala, lo comandant ditz quicòm al copilòt e sas responsas son laconicas. Lo comandant demanda al copilòt que prenga lo comadament de l'avion. Alavetz s’entend lo bruch d'una cadièra que va enrèire e una pòrta que se barra. Quand lo copilòt es tot sol, manipula los botons del «flight monitoring system» per començar de descendre. Aquò solament se pòt far d'un biais volontari. S’ausís de crits del comandant que li demanda que lo daisse intrar dins la gabina. Mas de la part del copilòt i a pas cap de responsa. Lo comandant pica la pòrta, mas i a pas cap de responsa tanpauc. S’ausís lo bruch de la respiracion del copilòt dins la gabina fins a l'impacte.
 
S’ausís de còps fòrça fòrts per ensajar de far tombar la pòrta de la gabina, qu'es blindada segon las nòrmas internacionalas de seguretat.
 
L'interpretacion mai plausibla es que lo copilòt volguèt pas dobrir la pòrta de la gabina al comandant qu'èra defòra e aviá accionat lo boton per pèrdre d'altitud volontàriament. La rason, l'ignoram entièrament. Se pòt interpretar coma una volontat de destruire intencionalament aquel avion.
 
S'examina la vida e l'entorn del copilòt, qu'es de nacionalitat alemanda. Fasèm d'enquèstas per comprene. Fins al moment de l'impacte, lo copilòt ditz pas cap de mot e respira amb normalitat. En cap de moment ditz pas res. Pas un mot. Silenci total. Las alarmas foguèron activadas per alertar de la proximitat de la tèrra. S’ausís un primièr impacte sus un talús a mai de 700 quilomètres per ora, abans que l'aparelh s'escrache. Cap de messatge d'ajuda ni d'emergéncia. Ni cap de responsa a las cridas.
 
Lo comandant s'avisèt de la situacion e, s’aviá pogut, auriá tombat la pòrta. Mas poguèt pas. Ieu parli pas de suicidi. Ieu disi que los elements qu'avèm visan una volontat de destruire l'avion.
 
Las victimas se'n devián avisar solament al darrièr moment. Solament s’ausís de crits al darrièr moment, just abans l'impacte.”
 
 
Lo protocòl d'urgéncia
 
Lo protocòl d'urgéncia de l'accès a la gabina es estricte. Se los pilòts dins la gabina respondon pas, los membres de l’esquipatge devon marcar un còde que dobrís la pòrta. Lo procediment requerís trenta segondas, e se dobrís la gabina pendent cinc segondas. Lo pilòt a l'opcion de blocar l'intrada dempuèi l'interior. Aital se pòt veire dins aqueste vidèo.
 
Le Monde a parlat tanben amb un comandant d’Air France sus l'accès a la gabina: “Es possible de s’embarrar dins la gabina. L'objectiu dempuèi l’11 de setembre [de 2001] èra d'evitar l'accès a la gabina d'un terrorista o d'un individú fòl. La pòrta es blindada. I a benlèu un accès d'emergéncia per còde numeric, quand l’esquipatge recep pas cap de responsa dels pilòts, en cas d'indisposicion, per exemple. Aquel còde activa una alarma dins la gabina: se los contrarotlaires respondon pas, se dobrís la pòrta. Mas lo còde numeric pòt èsser neutralizat pels pilòts”.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tàrrega Igualada (PP.CC,)
2.

No sé que impulsa a fer això, però en tot cas no hauria de passar ami més.
"Tàrrega".

  • 0
  • 0
francesc mallorca
1.

Los consorcis d'assegurances forman part dels governs capitalistes, e qui és que mana als governs ?: los banquiers. Edoncas, donan la culpa als trabalhaires, sempre pasa lo mateis ! Per pas pagar las milionàries indemnizacions o pagar mens del compte. Las messurgas repetides moltes vegades sonen com a veritats. Ve't ací ont s' acaba la libertat, la democràcia, l'igualtat....

  • 2
  • 2

Escriu un comentari sus aqueste article