Bandièra01 1180x150: Comuna de Tolosa

Actualitats

Comença una campanha de micromecenatge per finançar un ordenador nòu per Jornalet

Los Amics de Jornalet lançan uèi una campanha sul sit de Totsuma.cat per finançar la dotacion informatica qu’un jornal professional n’a de besonh

Los Amics de Jornalet lançan uèi una campanha de micromecenatge per finançar la dotacion informatica qu’un jornal professional n’a de besonh, en acòrdi amb çò que Jornalet cèrca d’ofrir cada jorn. Dins aquel sens, an causit lo sit de Totsuma.cat que permet de pagaments a partir de divèrses païses.
 
E mai se los mèdias de las lengas minorizadas an paucas ressorsas, la còla de Jornalet sèm a luchar per ofrir a Occitània un mèdia de qualitat. Ont l’argent es pas arribat, los jornalistas benevòls sèm a metre d’oras panadas a la familha, al sòm e al trabalh. Sèm encara aicí mercés a la nòstra perseverança, mas sustot al sosten dels Amics de Jornalet. Ara, nos donariá fòrça vam de trobar la solidaritat del pòble occitan e dels amics d’Occitània.
 
Per poder contunhar d’èsser editat amb los meteisses professionalisme e eficacitat, a Jornalet li fa mestièr d’acampar 3600 èuros per fin de crompar un novèl ordenador e per pagar coma cada an la mantenença e l’albergament del jornal.
 
Los Amics de Jornalet son una associacion de drech francés (lei 1901), creada per sosténer, despuèi l’estat francés, lo jornal electronic occitan Jornalet, editat en Catalonha, a Barcelona, mas subretot legit en Occitània.
 
 
Quant a las recompensas
 
Cal dire que se lo 21 de mai avèm pas amassat los 3600 èuros, lo projècte aurà pas capitat, Los Amics de Jornalet recebràn pas l’argent e la còla de Totsuma vos encaissarà pas res. Mas se capitam ben e se la còla de Jornalet pòt aver l’ordenador nòu, publicarem un article en vos mostrant l’ordenador e en publicant los noms de totes los qu’auràn fach possibla la professionalizacion d’aqueste mèdia.
 
En mai d’aquò, los qu’auràn donat d’argent recebràn las recompensas qu’auràn causidas:
 
— Los que donaràn de 25 èuros enlà recebràn lo pegasolet que ditz “Jornalet es possible gràcias a ieu”, inspirat de l’istoric “Òme d’òc”. Se tracta d’un adesiu de plan nauta qualitat, d’empegar especialament sus la veitura, mas que podètz metre ont volgatz.
 
— Al delà de tot aquò, de 50 èuros enlà, veiretz qu’es indicat un present de Macarèl, que sosten lo projècte en prepausant de camisetas, de pegasosets, de CD d’Albès e d’aimantons. Poiretz causir un present.
 
— Los que poiràn ajudar amb 100, 200 o 500 èuros auràn totes los presents mençonats e poiràn publicar una publicitat sus Jornalet per un mes, tres meses o un an respectivament. Es un bon moment per far conéisser sul mèdia occitan una associacion, un productor local, un afar, una ostalariá o çò que convendrà mai.
 
 — E los mai generoses, que poiràn donar 1000 èuros, auràn tot çò mençonat e recebràn la vesita d’una còla de l’#aranésòc, lo magazine informatiu occitan que s’emet sus Barcelona TV e tanben sus Jornalet. Que vendràn far un reportatge sus çò que lo mecènas convendrà: una associacion, un eveniment, una exposicion, un productor local, un afar, una ostalariá…

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jp la rapieta
14.

#11

Fau iò far a l'anciana.

Dubrir un quasernet de cheque, l'emplir, lu pausar dins una envelopa e l'envoiar mai una letra d'acompanhadament aus « amics dau Jornalet » que l'adreiça es dins lu bilhet, tot aquò sens obludar de leschar la vinheta postala.

Mamà

  • 2
  • 0
Gerard Joan Barceló Pèiralata
13.

#11 A la pagina de comentaris del projècte (http://www.totsuma.cat/projecte/1282/dotacion-informatica-per-jornalet/comentaris), lo president e lo clavaire dels Amics de Jornalet o explicam tot. Los que vòlon pas o pòdon pas pagar amb una carta bancària, an, per tant, la possibilitat de mandar de chècs a l'òrdre dels Amics de Jornalet. De chècs qu'encaissarem pas tant qu'aurem pas atenguda la tòca dels 3600 èuros, de segur.



Totun, lo pagament amb carta de crèdit es securizat. 



Encara un còp, un brave mercé a totes: sèm ara al 17%. Contunhatz de nos ajudar. 

  • 2
  • 0
gilós pietadós
12.

per lo mensh, podem pas díder qu'ètz pas aubèrts a la critica ! comentari inapropriat, aquò's un bon mejan end'avançar !

  • 1
  • 6
Miniconnectat
11.

E cossí far se volem pas dobrir un compte fèsboc?

  • 0
  • 0
Lutz
10.

#1 Lo bon costat de la retirada, es qu'as de temps de perdre, per exemple en anar vesitar un jornal en linha, per i dire que vos agrada pas.
Lo bon costat del micromecenatge, es que vos permet de donar sonque per çò que vos agrada.
I a de còps, la vida es plan faita… :)

  • 10
  • 0

Escriu un comentari sus aqueste article