Actualitats
Lo tribunal dels Dreches Umans condemna Espanha per la ‘doctrina Parot’
Pel primièr còp lo Tribunal Europèu dels Dreches Umans, amb sedença a Estrasborg (Alsàcia), s’es prononciat contra de la nomenada ‘doctrina Parot’, una interpretacion juridica que lo Tribunal Suprèm de l’Estat espanhòl establiguèt en 2006 per negar a qualques presonièrs bascos los beneficis penitenciaris que la lei establís, en los obligar a demorar almens 30 ans en preson.
Lo tribunal d’Estrasborg a admés lo recors presentat per la presonièra etarra Inés del Río Prada, condemnada a mai de 3000 ans de preson per divèrses assassinats terroristas. Lo tribunal condemna l’Estat espanhòl a pagar una indemnizacion de 30_000 èuros a la presonièra per damatges morals e n’exigís “la mesa en libertat lo mai lèu possible”. La cort d’Estrasborg considèra qu’Espanha viòla l’article 7 de la Convencion Europèa dels Dreches Umans, qu’establís que pòt pas existir una pena sens la validacion d’una lei, e que tanben viòla l’article 5, que protegís lo drech a la libertat e a la seguretat.
Del Río Prada deviá sortir de la preson lo 2 de julhet de 2008, mas l’Audiéncia Nacionala espanhòla empleguèt la ‘doctrina Parot’ per ne retardar la mesa en libertat al 27 de junh de 2017.
Lo govèrn espanhòl contra la senténcia
Ça que la, lo govèrn espanhòl a pas intencion de liberar Inés del Río. Lo ministre de l’Interior, Jorge Fernández Díaz, a anonciat que l’executiu de Rajoy presentarà un recors contra aquela senténcia e que demandarà que se’n suspenda l’execucion perque i a risc d’evasion. Lo ministre a acusat lo tribunal europèu de non aver pas cap de sensibilitat vèrs las victimas del terrorisme e a apondut que lo govèrn espanhòl es pas d’acòrd amb la senténcia. Lo govèrn espanhòl pagarà pas, liberarà pas la presonièra e abolirà pas la ‘doctrina Parot’.
L’estat espanhòl a tres meses per far efectiu lo recors contra aquela decision judiciala, qu’es la primièra que se fa contra la ‘doctrina Parot’.
Qu’es aquò la ‘doctrina Parot’?
La ‘doctrina Parot’ es lo nom amb lo qual se coneis la senténcia STS 753/2006 del Tribunal Suprèm d’Espanha, del 28 de febrièr de 2006: amb ela, la reduccion de pena al benefici dels presonièrs s’aplica cas per cas e non pas segon lo maxim legal autorizat pels presonièrs a perpetuitat, qu’es de trenta ans segon lo Còde Penal de 1973. Aquò vòl dire que se retarda de qualques annadas la sortida dels presonièrs. Dempuèi 2006, la justícia espanhòla l’a aplicada a gaireben un centenat de presonièrs d’ETA. Aquela senténcia constituiguèt la resolucion a un recors del membre d’ETA Henri Parot.
“Una granda victòria” pel collectiu de sosten als presonièrs d’ETA
Lo collectiu de sosten als presonièrs bascos, Herrira (cap al país), a dich que la decision del tribunal europèu es “una granda victòria”, e a demandat la derogacion de la ‘doctrina Parot’ e la mesa en libertat “de totes los presonièrs bascos qu’an complit la condemnacion que lor foguèt impausada”.
Dins un comunicat, Herrira a exprimit la satisfaccion del collectiu per la senténcia e a felicitat los ciutadans que se son mobilizats dempuèi d’ans contra la ‘doctrina Parot’, qu’“impausa de facto la condemnacion a perpetuitat als presonièrs politics bascos”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#8 Excellenta analisi, Maime. Partegi totalament ton opinion. Leis estats espanhòu e francés an una part grèva de responsabilitat e de marrida fe dins la violéncia qu'afècta lo Bascoat. ETA a una part de responsabilitat evidenta dins la criminalitat —tanben en important sa violéncia inacceptabla en Occtània— mai ETA es pas l'unic responsable.
#7 Me sembla que n'i a una diferéncia fondamentala entre la resisténcia a l'ocupacion alemanda, l'ETA de la debuta e l'ETA actuala. Quand ETA tua Carrera Blanco, en 1973, Espanha es una dictatura e tuen lo successor de Franco. Los resistents en Occitània tueren daus sodards alemands, son pas 'nar a Berlin per tuar daus civius. An pas tanpauc tuat daus francés sens saubre quau eran.
L'estratagia d'ETA era la de la terror indeterminada, pas una guerra contra una ocupacion. Una terror dins la societat basca per crear una tension dins la societat basca per la menar a una guerra civila, sola solucion militara possibla dins lo contexte politic actuau.
Per contra, fàcia au terrorisme, los Estats deven èsser exemplars. Cò que son pas. La justicia deuria èsser justa e pas excepcionala perque l'excepcion repressiva es çò que justifia lo terrorisme. Adonc, me sembla que fau condamnar las accions d'ETA mas condamnar maitot lo poder espanhòu emb sa politica d'excepcion, sa politica que laissa pas tanpauc la possibilitat aus etarras de pausar las armas per tornar dins lo politic. Sei plan content de veire qu'ETA pausa las armas e vòu s'implicar politicament. Aura los governaments espanhòu e francés an de compréner que la patz se fai emb l'enemic, que la solucion deu èsser accpetabla e acceptada per los dos sinon veiram leu leu una novela generacion de militants bascs que tornaràn a la violéncia politica.
Tot guerrièr es un tuaire. Cap guèrra non es neta ni pura. Cap mòrt non es mens mòrt qu'un autre. Cap cultura non es mens mortala qu'una autra tanpauc. Mon prepaus non es de justificar la violéncia d'ETA, se que non de reclamar l'egalitat davant la lei. Los tuaires d'ETA non son mai criminals que los de la CIA, ni que los autres criminals, oficials, oficioses ni illegals ! Mon grand-paire foguèt resistent (3 ans) contra los nazis qu'ocupavan sa tèrra en 39-45. O foguèt pas en lor sacant pel morre petalas de ròsa… De plomb per las maissas los ajudèt fòrt plan melhor a soscar un pauc al perqué e al cossí de lor preséncia illegitima sus una tèrra occupada qu'aviá pas vocacion a o demorar. Pensatz benlèu que se ganha una guèrra amb de rasonaments e de bonas intencions ? De las nòstras bonas intencions e dels nòstres rasonaments, fan uèit cents ans que França se'n chauta ben pro. Reagissèm amb çò que sèm e amb çò qu'avèm al ventre. Visiblament, los Occitans non son bascos. Cap besonh de demostrar…
#1 Operacions de resistença ?!!
Aucir 12 personas ?!
Per jo, n'i pas qu'ua sola justiça, le preson, e pausa, per aquera criminau.
#3 Qu'as rason cap e tot.
E mei de'quò, que dirí : "Mourir pour des idées, d'accord, mais de mort lente !"
Se's vòlen har petar lo cap, autaplan ! E s'aqueth monde e son en hrèita de sensacions hòrtas, qu'anin har saut a l'elastic o atau, sèi pas jo...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari