Bandièra01 capçalera  1180x150: Novestivada

Actualitats

OM – Bayern: pas de miracle al Velodròm

Dins los autres quarts de finala, las causas se dessenhan pro netament tanben

A l'estadi Velodròm, març s'acaba com aviá començat. Après uèit encontres sens cap de victòria, e davant las bandeiròlas capviradas dels suportaires provençals per marcar lo lassitge d'aquela maissanta seria, l'Olimpic de Marselha capitèt pas de tirar lo cap de l'aiga. La còla cèl e blanc manquèt de conviccion, d'agressivitat, de condicion fisica, de fisança. E a aqueste nivèl, òm pòt pas faire illusion. Lo Bayern de Munic gastèt pas sas ocasions (gòls de Mario Gómez e Arjen Robben), sens Schweinsteiger e amb una equipa que semblèt pas donar tot çò qu'aviá dins lo pit, los baviereses pausèron un bon pè en mièja finala. Pas jamai los atacants de l'OM poguèron èstre bravament dangieroses, e l'entrejòc provençal trapèt pas la luciditat e la frescor fisica per tafurar un chic lo sistèma solide de Munic. Didier Deschamps, que qualques uns vèson ja prene la plaça de Laurent Blanc al cap de la seleccion francesa, aurà de trapar de solucions que degun vei pas mai venir se vòl salvar la sason de l'OM. L'òbra serà pas de bon faire, aquò solide.


Dins los autres quarts de finala, las causas se dessenhan pro netament tanben. Lo Real Madrid, après setanta minutas d'una dominacion sens contèsta (mès sens fòrça oportunitats claras de dobrir la marca tanpauc), trobèt finalament la via de la gàbia de l'Apoel Nicosia. Benzema d'abòrd, puèi Kaka e encara Benzema, e l'afar èra jogat: ara caldriá un tèrratrem en Santiago Bernabeu per escampar los merengues de la Champions. Subretot qu'a mai d'un gòl, lo brasilièr capitèt una dintrada de qualitat, autor d'una passa decisiva e vector de dinamisme dins una còla madrilenca pro apatica fins alara. Probable qu'aquela prestacion farà soscar Mourinho per alimentar l'animacion del Real Madrid en aquela fin de sason.
 
Autanplan, l'avenir del Benfica de Lisbona en C1 sembla compromés. Una primièra tempsada barrada, sens dobertura vertadièra, puèi un estrambòrd dels portugueses mal contrarotlat e sens realisme en debuta de segond periòde, una man de John Terry dins la superfícia que l'arbitre siulava pas, e los blaus de Chelsea marcavan fin finala lo gòl a l'exterior tan important (Salomon Kalou, 75a minuta). Lo tornar en Stamford Bridge serà complicat, quitament si la qualitat de la còla lisboèta pòt daissar esperar una reaccion dimècres que ven.
 
Sonque l'oposicion entre dos mostres del fotbòl europèu reservarà incertituds. Lo Milan AC aculhiá Barcelona, après los aver ja encontrat en fasa preliminara (rampèl 2-2 al Camp Nòu, e victòria del Barça 3-2 a San Siro). Dins una partida dobèrta e vitèga, degun faguèt pas tremolar los fialats. Messi, Iniesta e tot l'ais central del terrenh blocats per una defensa milanesa fòrt plan organizada, lo Barça èra dins un embuc tampat, que se'n poguèron pas tirar. Lo tornar promet d'èstre apassionant: sens aver marcat a l'exterior, lo Barcelona serà a la mercé d'un gòl dels lombards. Una pluèja de gòls en prevision?
 
Las resultas:
 
OM – Bayern Munic 0-2 ; AC Milan – FC Barcelona 0-0 ; Apoel Nicosia – Real Madrid 0-3 ; Benfica Lisbona – FC Chelsea 0-1

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article