Bandièra01 1180x150: Comuna de Tolosa

Actualitats

Acòrdi entre Euròpa e los païses mediterranèus per luchar contra lo jihadisme

S’anóncia tanben una nòva reünion sus l’immigracion amb de mesuras intèrnas e extèrnas per trabalhar amb los païses d’origina

Se debanèt ièr a Barcelona una reünion dicha del Vesinatge Sud, entre los trenta dos païses de l’Union Europèa e la ribièra sud de la Mediterranèa, e lai s’acordèron sus de mesuras per combatre lo jihadisme. Los ministres dels afars estrangièrs d’aqueles païses prepausèron d’aumentar l’escambi d’informacion e la cooperacion en matèria antiterrorista e policièra.
 
La nauta representanta e cap de la diplomacia e la seguretat de l’Union Europèa, Federica Mogherini, remarquèt que los païses en conflicte —los de l’entorn, los europèus e los mediterranèus— se devon esforçar a ofrir d’oportunitats e de formacions als joves: “aquò es la clau per luchar contra lo terrorisme e evitar los combatents estrangièrs”, çò diguèt a prepaus dels joves europèus que van als païses en conflicte per s’entraïnar e que tornan en Euròpa amb l’intencion d’atemptar. “Intensificar la cooperacion en educacion o economia servís per que los joves ajan d’oportunitats de desvolopament e que las vejan. I a un compausant psicologic fòrça important que cal prene en compte”, çò apondèt.
 
 
Nòva reünion sus l’immigracion
 
Mogherini anoncièt tanben que se prepara una autra reünion, qu’amassarà de ministres de l’interior e dels afars estrangièrs de l’Union Europèa sus l’immigracion e los fenomèns migratòris. Aquò foguèt un autre dels tèmas que tanben se’n parlèt.
 
Dins aquel sens, Mogherini soslinhèt l’importància de la nòva reünion: “per lo primièr còp l’immigracion serà lo tèma central d’una conferéncia d’aquelas caracteristicas. Abordarem de mesuras intèrnas e extèrnas per trabalhar amb los païses d’origina de l’immigracion; se tracta de salvar de vidas”. En mai d’aquò, tanben diguèt que la Mediterranèa e l’Union Europèa devon cooperar mai perque partejan la region pus turbulenta del Mond a l’ora d’ara.
 
 
Conferéncia de caps religioses sul terrorisme jihadista
 
Lo ministre espanhòl dels afars estrangièrs, José Manuel García Margallo, anoncièt tanben que Barcelona aculhiriá en junh una conferéncia de caps religioses per impulsar lo dialòg e abordar lo terrorisme jihadista. Segon Margallo, l’encastre de l’Union Europèa e los païses de la ribièra sud de la Mediterranèa seriá lo “forum ideal” per la preséncia de Palestina e Israèl.
 
 
Espanha prepausa una cort internacionala contra lo terrorisme
 
Margallo faguèt doas proposicions per luchar contra la menaça jihadista. La primièra: crear una cort penala internacionala consagrada exclusivament a jutjar “de crimes de terrorisme”. Aquela idèa ja l’aviá explicada a la reünion del Conselh de Seguretat del mes passat a París.
 
Es una idèa que s’èra ja prepausada après la Segonda Guèrra Mondiala, e que trobèt dos trabucs: la dificultat de definir per consens çò qu’es e çò qu’es pas un delicte de terrorisme e la de s’acordar se dependiá de la Cort Penala Internacionala o pas, perque es un organ qu’a pas lo sosten de païses tant importants coma los Estats Units.
 
Ara, segon Margallo, la proposicion espanhòla serà facha en una reünion en Romania, amb de representants del govèrn espanhòl, dels Païses Basses e de l’UNÈSCO. Serà puèi formulada a l’Union Europèa e tanben a la Comunautat dels Estats Latinoamericans e Caribencs (CELAC).
 
La segonda idèa del ministre espanhòl es que l’Organizacion de las Nacions Unidas (ÒNU) designe un enviat especial apoderat pel secretari general per fin de coordenar totas las iniciativas ja existentas en aquela matèria. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernest Guevara L'Avana
1.

Espanha prepausa una cort internacionala contra lo terrorisme, çò que li permetriá sens contestacion internacionala possibla, d'embarrar de combatants basques per tot lo demai de sa vida sens aver a ne respondre davant los dreits de l'òme… Un mafiós qu' afotut su ltrepador detzenats de femnas esclavas, qu'a vendut milierats de dòsis d'estupeficants e de joves que mantes n'auran crevat de subredòsi, tombant en fòra de la lei jos la dependéncia de las substàncias ilegalas psicotròpas, un molon de fem atal poirà atal passar (se s'i fa préner) dos còps mens d'annadas en preson qu'un contestatari politic qu'arà tuat un o dos representants de l'òrdre de l'Estat qu'ocupa son país.

Lo dangièr ven de çò que la justícia es tostemps considerada (dins e fòra del djihadisme) coma quicòm d'absolut. Es absoluda, òc, mai que presèrve los interèsses dels dominants. Per çò mai, passa que t'ai vist…

  • 3
  • 0

Escriu un comentari sus aqueste article