Bandièra01 capçalera  1180x150: Botiga

Actualitats

Tragèdia aeriana dels Alps: la despollucion de l’endrech començarà en mai

Le Figaro n’a parlat amb lo responsable sus plaça de Lufthansa e publica un reportatge de la convèrsa

| Sébastien Thébault
Lo sit del Pueg dels Tres Evescats, on s’escrachèt l’avion de Germanwings, serà lèu netejat e las rèstas de l’aparelh ne seràn retiradas, segon d’informacions de Le Figaro. L’operacion comencèt fa un pauc mai d’una setmana e l’an fisada a una societat privada especializada dins la despollucion dels sits. Una autra entrepresa interven per l’evacuacion per elicoptèr de pèças de l’aparelh, que las menan a un calabèrt de Sèina. Las pèças restaràn ailà fins que lo procuraire de Marselha decidirà çò que ne caldrà far.
 
Le Figaro n’a parlat amb Carsten Hernig, responsable de Lufthansa de la restauracion del sit, e publica un reportatge de la convèrsa. Segon Hernig, s’estima que i aviá 4 tonas de querosèn a bòrd de l’aparelh escrachat e 95 litres d’òli lubrificant. Se sap tanben que lo sòl del sit de la tragèdia se compausa de 30 centimètres d’espessor de tèrra recobrissent de ròca dura.
 
Dins qualques jorns sauprem los resultats de las analisis, e se supausa que la despollucion començarà lo mes de mai. Ara per ara se fa de contraròtles setmanièrs per verificar la qualitat de l’aiga e que siá pas afectada per quina pollucion que siá.
 
Dins aquel reportatge, Hernig explica tanben que lo sit es susvelhat per una entrepresa privada e que tot lo trabalh que se fa sus plaça, se fa en pensant particularament a las victimas. Per ara, Hernig es sus plaça e i restarà “lo temps que caldrà”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article