Bandièra01 1180x150: Comuna de Tolosa

Actualitats

Un novèl editor “ponch com”

Queu novèl editor vòu tanben far una plaça a la creacion, en aculhir daus autors actuaus e en cerchar daus novèus talents

Caillon Dorriotz es un nuòuvengut dins lo mond de l’edicion. Un “ponch com” que vòu prepausar de las òbras classicas tan coma de las creacions originalas.
 
Quela novèla maison d’edicion publicarà nonmàs daus libres electronics. Qu’es çò que se ’pèla un editor “ponch com”, lo tèrme se podent aplicar a tota entrepresa que trabalha unicament sus Internet. Sos libres se trobaràn sus las principalas librariás en linha.
 
Caillon Dorriotz vòu prepausar de las òbras classicas en lengas francesa e occitana. Per exemple, dins sa colleccion Classics Nòstres, vòu balhar l’ocasion de tornar trobar los grands tèxtes de la literatura d’òc. Seràn tanben publicats en francés dins una colleccion Classiques d’Oc. Lo primier que sortirà dins las setmanas venentas serà una reedicion de l’Istòria de Joan-l’An-Pres. En francés, la colleccion Amérique Francophone vòu difusar de las òbras quebequesas interessantas dau ponch de visda literari mas pauc conegudas. Es ja publicada la pèça de teatre de Laure Conan, Si les Canadiennes le voulaient!(Se las Canadianas o Volián!), ont los tres personatges se calculan sus lo patriotisme, los fondaments de la nacion canadiana mai lo ròtle que i deurián jogar las femnas.
 
Queu novèl editor vòu tanben far una plaça a la creacion, en aculhir daus autors actuaus e en cerchar daus novèus talents. Daus tèxtes universitaris o sus l’actualitat seràn maitot publicats, coma lo primier obratge que sòrt questa dimenjada. S’agís d’un tèxte que coneisson ja los legeires de Jornalet. Qu’es la compilacion de la cronica de Matiàs Gibèrt a prepaus de la translatio studiorum, l’istòria dau transferiment de la filosofia grèga de l’Orient d’ací a l’Euròpa medievala mercés aus josieus d’Occitània.
 
L’originalitat de quel editor es de se posicionar nonmàs sus lo libre electronic, çò qu’es novèu dins lo domeni occitan. Demòra de veire se los legeires seràn aquí.
 
 
 
 
Maime Caillon

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article