Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasMontpelhierenc

Montpelhièr inaugura son primièr cursus public bilingüe occitan-francés

L’inauguracion se debanarà lo 7 de mai que ven amb la participacion de Moresca [Mauresca]. La FÈLCO qualifica l’eveniment de “victòria vertadièra”

| FÈLCO
Lo 7 de mai que ven s’inaugurarà a Montpelièr lo primièr cursus bilingüe occitan-francés de l’Escòla Francis Garnièr. L’acte comptarà amb la participacion de la rectritz Armande Le Pellec-Muller e del cònsol de la vila Philippe Saurel.
 
La Federacion dels Ensenhaires de Lenga e Cultura d’Òc (FÈLCO) celèbra aquel eveniment coma “una victòria vertadièra”. “Fasiá dètz ans que voliam dobrir un cursus bilingüe public dins la vila de Montpelhièr”, çò a dich la FÈLCO dins un comunicat.
 
“L’an passat, dins l’encastre de l’esquèma departamental del desvolopament de las lengas vivas, las conselhièras pedagogicas trabalhèron sur un calendièr de dobertura dins cada departament de Lengadòc. Dos sits foguèron retenguts: en Losera, lo sit de Maruèjòls, e en Erau, l’escòla mairala Francis Garnièr ont i aviá ja un pòst occupat per un ensenhaire bilingüe e l’escòla elementària Marie de Sévigné ont i aviá tanben un autre pòst estampilhat «occitan»”, çò precisa lo comunicat qu’explica que, en mai d’aquò, “aprèp d’acamps amb de parents, 30 escolans se trobèron marcats amb una lista d’espèra de 7 escolans”.
 
Per aqueste cursus, la còla pedagogica a causit de trabalhar d’un biais novèl:
 
— Lo diluns e lo dimars sont las jornadas del francés, totes los escolans, monolingües et bilingües, son mesclats.
 
— Lo dijòus e lo divendres son las jornadas de l’occitan; los escolans bilingües van dins la classa bilingüa, e los autres escolans son mesclats dins las doas autras classas.
 
Mas tota l’escòla fa d’occitan dins la setmana per crear de ligams entre totes los enfants.
 

Lo programa de la jornada del 7 de mai
 
09h00-12h00: talhièr de lenga e de cultura occitanas
14h00-15h30: talhièr de lenga e de cultura occitanas
 
Festejada
 
16h00: cançon dels escolans amb Moresca [Mauresca], dobertura al public
16h15: presas de paraula oficialas
17h00: concèrt de Moresca [Mauresca]

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tarrega (PP.CC.)
1.

Bilingüe bé, però també Occitana, no deixeu d'intantar-ho, ara tota en Occità.
"Tàrrega".

  • 1
  • 0

Escriu un comentari sus aqueste article