Bandièra01 capçalera  1180x150: Botiga

Actualitats

Niça: remesa dei prèmis de la 13a Dictada Occitana

Linda Serravalle obtenguèt lo primièr prèmi, seguida de prèp per Graslan Quentin e Falcoz Fanny

Lo diluns 20 d’abril èran 12 escolans de terminala ostelariá-restauracion, del Licèu de prestigi Paul Augier de Niça, a se lançar per la tretzena edicion de la dictada en occitan niçard.
 
Es al retorn de las vacanças de la prima, l’11 de mai, qu’aguèron l’astre d’èsser premiats per l’APLR (Associacion Per las Lengas Regionalas) e la ràdio niçarda Niça Pantais (escrich “Nissa Pantai”) e felicitats per lor professora d’opcion occitan, Clementina Comte.
 
Es l’escolana Linda Serravalle qu’obtenguèt lo primièr prèmi, seguida de prèp per Graslan Quentin e Falcoz Fanny.
 
La direccion, representada pel cap d’establiment Sénher Marie e son adjunta Dòna Vial-Pradel, manquèt pas de felicitar calorosament los premiats e de mercejar sincèrament lo president de Niça Pantais, Cristòu Daurore, lo vicepresident e ancian escolan del licèu Paul Augier, Jonathan Santilli, e Reinat Anfosso, representant de l’APLR, per lor preséncia e lor generositat.
 
La professora clavèt l’eveniment en felicitant totes sos escolans, fièra de lor percors e de lor investiment en classa e per la dictada. Foguèt l’ocasion de valorizar la lenga pròpria de Niça en amassant de practicants joves e mens joves a l’entorn de valors comunas.
 
 
 
 
Clementina Comte

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article