Bandièra01 capçalera  1180x150: Novestivada

Actualitats

Las YPG e aligats, a mand de completar la reconquèsta de tota la val assiriana de Khabur

Bandièras de las YPG, YPJ, MFS e del vilatge assirian en Khabur
Bandièras de las YPG, YPJ, MFS e del vilatge assirian en Khabur | MFS

L’Estat Islamic capita pas d’ocupar lo territòri après tres meses d’ofensiva. Los jihadistas, desfaches per una coalicion de fòrças curdas, assirianas e aràbias. Lo Khabur es una de las paucas zònas de majoritat assiriana dins la region.


L’Estat Islamic (EI) es a mand de pèrdre lo contraròtle sus tota la val assiriana del riu Khabur, dins lo canton de Cizîre (Curdistan Occidental, Siria), après una operacion aviada i a quinze jorns per las milícias curdas (YPG e YPJ), assirianas (MFS e Gàrdias de Khabur) e aràbias de la tribu Shammar (Al Sanadid) amassa. L’avançada de las fòrças antijihadistas a recebut lo supòrt aerian dels bombardaments de la coalicion dirigida pels EUA contra las posicions de l’EI.
 
La recuperacion de la val per las YPG e los sieus aliats es estada favorida per l’ocupacion del mont Evdilezîz (Kizwan), just al sud del riu Khabur, entre los 19 e 20 de mai. Aquò rendèt plan mai dificil als combatents de l’EI de defendre las lors posicions dins la val, e an perdut pauc a cha pauc gaireben totes los vilatges que contrarotlavan.
 
Dins aqueste vidèo se vei un combatent de l’MFS que retira una bandièra de l’EI a Ghebish e la remplaça per una de la milícia assiriana:
 
 
 
La val de Khabur es fondamentala per dos motius. Un, perque es la rota naturala que religa Serê Kanîyê (Ras al-Ayn) amb Hesîçe (Al-Hasakah), doas de las vilas mai importantas del canton de Cizîre. E dos, perque es un dels pauques territòris ont los assirians son la populacion majoritària. Los assirians considèran la val de Khabur coma un dels sieus santuaris principals e una de las garantias de la lor existéncia coma pòble.
 
La val èra estada a las mans de las milícias curdas fins febrièr de 2015, que l’Estat Islamic i comencèt una granda ofensiva. Las YPG-YPJ, l’MFS e las Gàrdias de Khabur an combatut dempuèi aquel moment per evitar que l’EI ocupèsse tota la val e lo sieu cap, la localitat de Tel Tamir.
 
Sus aquesta mapa de Mark Monmonier se vei tot lo canton de Cizîre e las linhas de progression de las YPG e dels sieus aliats en Khabur:
 
 
 

Una implantacion d’80 ans d’istòria
 
Los assirians s’installèron dins la val de Khabur dins las annadas 1930. Èra de familhas expulsadas de la region de Hakkari, al Curdistan del Nòrd (Turquia). Abans la guèrra actuala, s’estimava que la populacion assiriana sul territòri de Khabur èra d’aperaquí 20 000 personas.
 
D’autres territòris del Curdistan Occidental tenon tanben de populacions assirianas mai petitas, coma la vila de Qamishli. En 2014, las autoritats de Cizîre declarèron l’assirian lenga oficiala del canton, amassa amb lo curd e l’arabi.
 



Aquesta nòva es adaptada de Nationalia amb qui Jornalet a un acòrdi de cooperacion

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article