Bandièra01 1180x150: Comuna de Tolosa

Actualitats

Consultacion dobèrta sus la reforma escolara

Lo ministèri francés de l’educacion fa servir un sit web per que se pòsca dire son ponch de vista. Es dobèrt fins al 12 de junh

Éduscol, lo portal estatal dels professionals de l’educacion de França, a mes en linha una consultacion sus las reformas pedagogicas. Es dobèrta fins al 12 de junh per que los ensenhaires de l'estat i pòscan exprimir lor ponch de vista.
 
La tòca d’aquel sondatge en linha es de reculhir los vejaires e las reaccions de l'ensems dels ensenhaires sus las proposicions del Conselh Superior dels Programas. “En participant a las consultacions, venetz actors de la refondacion”, çò ditz lo sit. Cal esperar qu’aquel sit semonda de garentidas democraticas e que siá pas una engana per justificar de decisions rebutadas per l'ensems dels ensenhaires.
 
 
Protèstas contra la reforma del collègi
 
Cal remembrar que los ensenhaires del país, e quitament de tot l’estat francés, an mostrat majoritàriament lor refús a la reforma del collègi. Lo 19 de mai passat, se debanèt una jornada de grèva, e s’organizèt de mobilizacions. Los ensenhaires planhon la reforma que la prepausa la ministra francesa de l’Educacion, Najat Vallaud-Belkacem. Segon eles,  empejorarà la situacion actuala e possarà una partida dels parents a se n’anar dins l'ensenhament privat. En mai d'aquò,  se dison malcontents de la desinformacion de l’administracion e quitament deploran d’“informacions falsas”.
 
 
Desaparicion de l’occitan
 
Demièg d’autres aspèctes, aquela reforma cèrca de metre l’accent sus l’aprendissatge de las matèrias que la ministra considèra fondamentalas, e doncas, l’occitan e d’autras matèrias seràn relegats als nòus ensenhaments practics interdisciplinaris (EPI) , amb una ora per setmana.
 
Divèrses collectius d’ensenhaires manifestèron dimars passat per tot lo país, e quitament se presentèt al ministèri francés de l’Educacion de peticions contra la reforma actuala.
 
En Occitània se manifestèt a Bordèu, Carcassona, Clarmont-Ferrand, Limòtges, Marselha, Montpelhièr, Mende, Narbona, Nimes, Niça, Tolon e Tolosa.
 
 
Una peticion de mai de 5500 signaturas
 
Per mostrar lo desacòrdi, e per demandar que l’ensenhament de las nòstras lengas se mantenga, per que se melhore la precària situacion actuala, s’es lançada una peticion publica devèrs lo Ministèri francés de l’Educacion Estatala, qu’a ja atench mai de 5500 signaturas.
 
La Federacion dels Ensenhaires de Lenga e Cultura d’Òc (FÈLCO) es a l’origina d’aquela peticion que sos primièrs signataris son las associacions d’ensenhaires de las lengas minorizadas de l’estat francés.
 
 
Manifestacion a Peireguers
 
De mai, se prepara una manifestacion solament per revendicar l’occitan dins l’ensenhament: a l’escòla, al collègi e al licèu, pel 6 de junh que ven a Peireguers (Peiregòrd Central).
 
Lo Collectiu Occitan Peiregòrd fa una crida a manifestar a Peireguers, lo 6 de junh que ven, per revendicar l’occitan a l’escòla, al collègi e al licèu. Dins aquel sens, lo collectiu demanda a las associacions, als amoroses de la lenga e de la cultura, als escolans, als elegits e a tot lo mond de bona volontat d’i participar.
 
 
 

eduscol.education.fr/consultations-2014-2015

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip Martèl Montpelhier
5.

#4 Era la proposicion que la FELCO aviam fach au Conselu superior dels programas quand nos avia recebuts a la debuta de 2014. Tornam trobar nostra proposicion, mas aqui ont parlaviam d'integrar la reflexion sus la pluralitat linguistica francesa dins l'ensems dels ensenhaments de francés e d'ist-e-gé, los trobam aüra embarrats dins la reserva cheiena dels EPI. E se confirma au ministèri (a costat de l'anoncia d'una circulària que nos deuria, dison, rassegurar) que lo principi dels EPI es que chasc'an l'escolan ne fai un autre per n'aguer fach sieis en fin de cicle . Vol dire que la continuitat es rota, quitament se lo prof d'occitan capita de se resquilhar dins mai d'un EPI (ço que voudrè dire que li chalrè se pagar chasc' an la participacion a 6 EPI per estre present sus totes los nivèus... Bonjorn las oras sup, a condicion naturalament que lo principau accepte, o aie los means de las pagar. Quant de cops vos chalrè repetar que los EPI son una usina a gas irrealizabla dins la realitat d'un establiment ?

  • 1
  • 0
garric
4.

S'en parla pas gaire, mès l'Occitan es estat plenament integrat al Sòcle. Es donca considerat coma una matèria fondamentala.

  • 4
  • 1
JCD
3.

#2 una decha : escolar e solar, puslèu que escolari e solari, mea culpa.

  • 2
  • 0
JCD
2.

Puslèu que la reforma dau sistema escolari, ieu sei per la reforma dau sistema solari, mas filh de lop, que quò es queu solelh qu'es au mitan ? me diràs-tu ? Quò deuriá tot virar a l'entorn de la Tèrra e puèi me faretz pas creire que la Tèrra es redonda o esferica, es plata coma un crespareu. Anem, fajam 'na manif per lo sistema solari tornar baptisat sistema terrari o terrian, sabe-ieu. Los anges poguessan nos ajudar ! Qui vòu venir ?

  • 1
  • 0
Lachaud Pierre
1.

L'òm es totjorn a batalhar contre una reforma , contre, contre, contre.
Si l'om parlava un pauç de la reforma completa dau sistem escolari?
Dins los pais de lenga d'oil i a una sola lenga, una sola cultura, una sola istòria. Dins los pais ente i a una lenga dicha regionala i a doas lengas, doas culturas, doas istòrias. N'i en v-una de devalorisada, reprimada, l'autre es obligatòria. I a ambiguitat.
Veiqui una petita istòria. Un còp era, un merle purava perque aquela prima avia pas trobat de merlata per far familha. Los autres merles se mocavan de se : son niu s'esbolha tots los 8 jorns, chantava tant faus quu'n jau e de mai passava per un ors.
Nòstre merle decidet de prener una annada sabatica. Trobet un mestre a bastir, un mestre de chant, e un psicologue. Los autres disian : "pertant era ben 'nar a l'escòla pus lonh que lo bac". Respondia : "sabetz ben, l'escòla vos dit, aqui i a tala tecnica, pus lonh quo es diferent, alhors quo es pas parier, mas vos aprenen pas la tecnica".
La prima que seguet avia far un brave niu plan solide. se botet de chantar e coma la merlata tardia a venir, uflet son parpalh tant que poguet e prenguet daus aers d'opera. Alaidonc la merlata arribet e li faguet fòrça compliments.
L'ensenhament es enguera aquel de las annadas 50. Es temps de lo cambiar. Mas, tant qu' a far de lo cambiar tant valdria mielhs cambiar tota la societat. E cambiar sa pensada. Aqui i a un espace que la cultura occitana devria prener e pas se contentar de parlar dins lo cadre de las structuras actualas.

  • 2
  • 3

Escriu un comentari sus aqueste article