Laurence Cadenet Boscus es una artista pintra decoratritz d’interiors roergata. “Ja a l’escòla aimavi lo dessenh, la vida m’a menat sus un camin artistic ont ai descobèrt la pintura decorativa, que m’a permés d’utilizar l’art de diferentas faiçons”, çò explica.
 
Entre d’autras prestacions, Cadenet Boscus utiliza las tecnicas ancianas dins sos tablèus. Los supòrts son de fusta recobèrta d’enduch, tenches dins la massa amb de pigments naturals. Dins cèrts enduches, l’artista apond de sable o de posca de marbre per obtenir un leugièr brilhant. Las decoracions son penchas amb de calç tencha amb de pigments naturals, çò que dona un resultat plan mat e brut.
 
Cadenet Boscus trabalha las parets, los mòbles, las gorbilhas... tot de la meteissa faiçon, totjorn en emplegant las tecnicas ancianas per fabricar sas pròprias mesclas, d’un biais fòrça artistic.