La Calandreta de Siron, plaçada a Barçac (Grava), a lançat una campanha de micromecenatge per aver una cort de recreacion coma cal. Dempuèi la rintrada passada, l’escòla occitanofòna benefícia de locals entièrament renovats, gràcias a la municipalitat, çò que li permet d’aver las melhoras condicions en classa. Mas al moment de las recreacions an un bèl espaci exterior qu’es pas amainatjat.
 
L’argent que s’amassarà amb aquesta campanha servirà a completar la subvencion de 2000 èuros que ven de la resèrva parlamentària. Aquela subvencion publica finança un projècte a la nautor del 50% al maxim. Se tractarà d'amainatjar la cort e de crompar de material de motricitat.
 
Cal dire que, se la campanha reüssís pas, lo projècte serà pas realizable. E totes sabèm que la cort es un luòc privilegiat ont los enfants se rescontran per escambiar, partejar, jogar, s’espaciar...