La ciutadana occitana Evalina Houlès, a anonciat aqueste dimècres a miègjorn que comença una cauma de la fam a l’Ostal de Region de Tolosa, en tot s’apondre a l’accion de Dàvid Grosclaude (vidèo). “Lo moment es vengut per mostrar als politics e tanben a la societat occitana que sèm determinats”, çò a dich la caumaira en tot esperar que i aja mai de mond a la jónher “perque cal mostrar que sèm nombroses los que partejam aquel vejaire sul mespretz”. De soslinhar que Grosclaude a passat un mes a preparar sa cauma de la fam, mas es probable que siá pas lo cas d’Houlès.
 
L’accion d’Evalina Houlès fa preveire qu’un movement de protèsta contra lo mesprètz es a espelir en Occitània.
 
Mentretant los sostens son arribats de pertot en Occitània e quitament de la Val d’Aran, ont Unitat d’Aran, Corròp per Aran e quitament lo Conselh General d’Aran an publicat de comunicats de sosten a Grosclaude.
 
 
Jornada de mobilizacions
 
Houlès a anonciat son accion dins l’encastre d’una jornada de mobilizacions que se debana dins Occitània tota en sosten a la cauma de la fam que lo conselhièr regional Dàvid Grosclaude ten dempuèi uèch jorns. Los elegits del Partit Occitan (PÒC) Guilhèm Latrubesse, Gustau Aliròl e Arvèi Guerrera an anonciat una accion simbolica de 24 oras de cauma de la fam davant los ostals de region a Tolosa, Clarmont-Ferrand e Marselha respectivament, e los sostens se multiplican. Al delà d’aquelas tres vilas, se son anonciats de junis e d’acamps de protèsta davant qualques vilas d’Occitània, dont a Aush davant la comuna e a Pau a la Plaça Reiau. E mai a l’ostal de region a Bordèu, ont Grosclaude mena a tèrme son accion.
 
 
Lista de recampaments