L’occitan serà una lenga presenta e fòrça vesedoira dins Tolosa en escasença del Campionat d’Euròpa de Fotbòl (Èuro 2016). L’eveniment esportiu europèu que l’estat francés l’aculhirà a previstes quatre matches dins la Ciutat Mondina los 13, 17, 20 e 26 de junh, e la comuna crei qu’es l’escasença de mostrar l’occitan al Mond.
 
La guida del suportaire serà dins qualques lengas europèas dont tanben la lenga del país, gràcias a Convergéncia Occitana. “L’enjòc es d’installar l’occitan un pauc pertot dins Tolosa, pas per remplaçar lo francés, mas per marcar l’identitat territoriala e donar un testimoniatge de la nòstra cultura a las gents que venon d’endacòm mai”, çò ditz Jean-Michel Lattes, primièr adjonch al cònsol en carga dels desplaçaments e de la cultura occitana, segon çò qu’a publicat 20 Minutes.
 
A l’ora d’ara l’occitan es pas la lenga de comunicacion abituala dels abitants de la Vila Ròsa, coma o èra fa qualques decennis, mas es de mai en mai present e aimat. “Ongan, lo festenal Rio Loco va presentar una tematica occitana e i aurà un mond fòl”, e mai “fòrça estrangièrs demandan de far la vesita dins aquela lenga”, çò precisa Lattes.
 
Cal esperar, e benlèu demandar, que l’exemple tolosan farà taca d’òli dins las autras vilas d’Occitània qu’aculhiràn l’Èuro 2016, es a dire: Bordèu, Marselha e Niça.