Saique los legeires de Jornalet auràn pas ausit parlar de la libertat de panorama. Mas los que contribuisson amb lors fòtos a las galariás d’aqueste jornal, o tanplan los usatgièrs de Wikipèdia, per exemple, ne son mai que mai concernits. Se tracta d’una disposicion contenguda dins las leis de la proprietat intellectuala de fòrça païses e que permet de far de fotografias, vidèos o dessenhs de bastissas, esculturas e d’autras manifestacions artisticas localizadas dins un espaci public, sens transgredir cap de lei dels dreches d’autor de las òbras. Uèi, lo Parlament Europèu vòta un emendament, prepausat pel deputat francés Jean-Marie Cavada e la Comission dels Afars Juridics, que recomanda de restrénher la libertat de panorama a d’usatges non comercials.
 
Los wikipedistas europèus se son mobilizats per la possibla abolicion d’aquela libertat de panorama pr’amor que se tracta d’una mesura restrictiva qu’afectariá mai que mai lo prètzfach que mena l’enciclopèdia liura, ja que parteja popularament e liurament las coneissenças dempuèi catòrze ans. “Tant l’usatge comercial coma lo non comercial son pas clarament definits dins Internet, e lo movement Wikimèdia encoratja la libertat pels collaboradors, tot lo nòstre contengut es subjècte a una licéncia que permet tanben l’usatge comercial”, çò declarèt a Vilaweb l’assocacion catalana Amical Wikimedia.
 
La campanha precisa que “Wikipèdia a pogut illustrar d’òbras que son dins d’espacis publics perque la majoritat dels païses de l’Union Europèa an la libertat de panorama, una excepcion als dreches d’autor que permet de far e de publicar sens cap de restriccion de fotografias d’espacis publics, en tot protegir la proprietat intellectuala e d’autres dreches similars dels arquitèctes e dels artistas visuals. [...] Ara, mantes d’aqueles imatges son en perilh en consequéncia d’una proposicion presentada al Parlament Europèu, qu’a l’intencion de limitar l’usatge d’aqueles imatges al domeni personal. Se s’apròva lo tèxt restrictiu dedins la procedura legislativa de l’Union Europèa sus la reforma dels dreches d’autor, caldrà eliminar de milièrs e de milièrs d’imatges de la Wikipèdia, perque legalament se poiràn pas difondre liurament”.
 
Abans lo vòte an ja mostrat lor descòrdi los grops de l’Aliança dels Democratas e Liberals per Euròpa (ALDE) e los Verds-Aliança Liura Europèa (Verds-ALE).


Mesa a jorn 14:30

Lo Parlament Europèu a refusat majoritàriament l'emendament, prepausat pel deputat francés Jean-Marie Cavada e la Comission dels Afars Juridics. La libertat de panorama se ten.