Bandièra01 1180x150: Comuna de Tolosa

Actualitats

L’Eurogrop prepausa de donar a Grècia tres jorns per implementar sas promessas

Lo ministre de finlandés de las finanças ditz qu’es una “proposicion fòrça bona” que compren “de condicions duras en la reforma del trabalh, las pensions e l’IVA” e mai de privatizacions

L’Eurogrop s’acordèt ièr dimenge per ofrir a Grècia de temps fins a dimècres que ven, 15 de julhet, e per aprovar una seguida de leis e reformas que permetan la dobertura de las negociacions per un tresen salvament. Segon çò qu’expliquèt lo ministre finlandés de las finanças, Alexander Stubb, la proposicion compren “de condicions duras en la reforma del trabalh, las pensions, l’IVA e los impòstes”, e tanben “de mesuras duras en las privatizacions”. La proposicion dels ministres de las finanças, que segon lo president de l’Eurogrop, Jeroen Dijsselbloem, a encara “qualques tèmas dobèrts”, es ara sus la taula dels caps d’estat e de govèrn de l’Eurozòna, amassats a Brussèlas amb lo primièr ministre grèc, Alexis Tsipras.
 
Los ministres de l’economia e las finanças de l’Eurozòna presentèron lors conclusions après lor reünion ièr de ser als caps d’estat e de govèrn, segon çò qu’a explicat Jeroen Dijsselbloem, qu’a indicat que depend “ara d’eles”.
 
Lo ministre finlandés Alexander Stubb diguèt que la proposicion sus la taula es “fòrça bona” e “ambiciosa”. Segon Stubb, se cal dobrir de negociacions sus un tresen salvament grèc a travèrs del fons europèu de salvament, cal qu’abans “lo govèrn grèc e lo parlament grèc” apròven las mesuras qu’exigisson los sòcis de l’Eurozòna. “An un bon document e una bona basa per negociar”, çò diguèt lo finlandés, que dissabte èra un dels mai reticents a un tresen salvament per las pressions intèrnas dels populistas dels Verais Fineses dins son govèrn.
 
 
Matteo Renzi: “li disi a Alemanha que n’i a pro”
 
“Itàlia vòl pas que Grècia quite l’èuro e li disi a Alemanha que n’i a pro”, çò diguèt lo primièr ministre italian, Matteo Renzi. “Ara que Tsipras a fach de proposicions en acòrdi amb las exigéncias europèas, nos cal absoludament signar un acòrdi. Umiliar un sòci europèu après que Grècia aja renonciat a gaireben tot es impensable”, çò precisèt.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article