Dins lo Sistèma Solar, cada planeta se mòu segon son ritme, amb lo Solelh al centre. D’aquel imatge, lo grafista anglés Luke Twyman ne tirèt fa cinc ans una idèa força fortunada: Solar Beat. Consistissiá a convertir, amb un simple sit web, la frequéncia orbitala del Sistèma Solar dins una boita de musica ont cada planeta aviá d’assignada una nòta que sonava segon la siá orbita a l’entorn del Solelh.
 
Èra pas pro sonhada scientificament, l’aisina de Solar Beat, mas a agut fins ara pro d’acceptacion sul ret perque Twyman aja decidit de redessenhar lo sit amb una interfàcia nòva e en i apondent d’opcions per contrarotlar lo son. Tot aquò fa fòrça mai plasent lo son de las planetas que son a dançar a l’entorn del Solelh.