Bandièra01 1180x150: Comuna de Tolosa

Actualitats

Torn de França: “Libertat dab lo Jornalet”

Una còla de militants occitanistas del país an fach de publicitat per Libertat e per aiceste jornal sus la rota de l’espròva esportiva

Totas las televisions de tota la planeta emeton d’imatges del Torn de França, una espròva esportiva que las bicicletas i travèrsan cada an lo país nòstre d’Occitània e qu’ongan a una atencion especiala per la valentiá de l’esportiu catalan Joaquim Rodríguez, dich “Purito”. Es pr’amor d’aquò que los movements politics e socials del nòstre país aprofièchan l’eveniment per mostrar al Mond qu’aicí es Occitània, en tot arborar de drapèls o de bandieròlas e en pintant de tags pertot ont la corsa se passa.
 
Aqueste còp nos a atrach l’atencion un tag aparegut sus una estrada, que s’i podiá legir “Libertat dab lo Jornalet”. Es aital qu’una còla de militants occitanistas del país an fach de publicitat pel movement revolucionari Libertat e per aiceste jornal sus la rota del Torn de França. Los revolucionaris occitans an revendicat tanplan l’independéncia d’Occitània e an manifestat lor solidaritat amb Grècia e lor oposicion al Fons Monetari Internacional (FMI).
 
Lo Torn intrèt en Occitània diluns en Bearn. Passèt per Tarba, Cauterés, lo País Tòi e lo mitic Còl de Tormalet. Dijòus anèt de Lanamesa fins al Plan de Belha en Savartés. Ièr partiguèt de Murèth. Passa per Rodés e Mende fins a arribar deman a Valençat. Diluns que ven, 20 de julhet, serà partit d’Arpitània per tornar en Occitània a Gap, ont los esportius se pausaràn una jornada. Lo 22 partiràn de Dinha fins a Pratlop, en Ubaia. D’ailà tornaràn a Gap per percórrer los Alps occitans e arpitans en finissent al mitic Alp d’Ueis (Oesen).

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc mallorca
42.

Cada an novel a lo torn se vesen plus banderas occitanas e catalanas, lo que me fa molt content. Occitània es preciosa tan verda, amb sos arbres frondosos, sas ciutats amb sos castels, catedrals, sas muntanas polidas e tan altas, sos flums jos las valadas, los camps carrats dels sementers de blat, ordi, e vinhas, de diferents colors, coma los pintava Van Gog. La granda Occitània es lo milhor de torn. e una vegada passada lo torn a pas interés.

  • 4
  • 0
Margòt
41.

#38 Per dire " son figas d'un autre panièr " efectivament, se ditz en francés : " c'est une autre paire de manches ".....mas aquò son las margas del vestit .
En francés i a omonimia entre " la manche " e " le manche " los equivalents de " marga " e " margue ".

  • 1
  • 0
frere borisdanov Tèrra socialisme e libertat
40.

Que son militants e amics de libertat qu'aven hèit aquò. Lo tor b'ei tostemps lo meijan d'amushar qu'existen ua revendicacion occitana politico-culturau!
Qu'ei jà ua causa de las bonas de har aquò e mesma si lo messatge n'era pas dens la mia ideologia que serei ja hèra uros d'ac veder d'autes a la tv .
Qu'i a 40 messatge entau 4 pintadas e que m'agraderei HERA l'inversa.
Sus la question d'independencia n'i a pas ua arrevendicacion de libertat! mès i a quauques camaradas que son indep donc que pòt apareixer atau.
E'ei desconectat de la realitat nosta? SOLIDE! nat problem sus aquò, d'alhor si qu'era l'inversa n'i aurè pas aquesta discutida sus aquest subject.

Libertat! que va prepausar un texte d'orientacion estrategica rapidament, on qu'avençam lo concept de liberacion revolucionari deu pòple en oposicion au concept de liberacion nacionau. e tb lo concept centrau d'autodeterminacion. Suu projèct politic entad occitania que prepausem lo camin deu socialisme (dens lo sens prumer). Après qu'explicam tanben quin camin de luta que pensam que devem causir entad arrivar ad aqueth liberacion sociau e tanben nacionau, l'ua ne pòt pas anar shens l'autas. Tot aquo que seran quauques basas pr'amor ne vam pas arrestar un projèct atau en quauques paginas. Lo projèct que's bastira dens la luta au contact deu pòple.

sustot l'important qu'ei d'anar per las carreras e lutar!

Tèrra, socialisme e libertat!

  • 1
  • 0
Gèli Grande Lairac en Agenés
39.

#36
Car JCD
Volètz de paginas Facebook del PNO vaqui lo nom de las doas que fasèm

Partit de la Nacion Occitana - PNO e
Parti de la Nation Occitane - PNO

e i ajusti lo nòstre blòg
http://lo.lugarn-pno.over-blog.org/

coma aquò saurètz çò que pensam e çò qu'escrivèm

Bona lectura


  • 3
  • 0
Terric Lausa Quilhan
38.

#36

A partir d'una demanda trapar quantitats d'informacions sul nacionalisme occitan amb internet es ultrafacil, amb quin motor de recèrca que siá.

Per contra difusar activament d'informacions cap al public general, aquò se sòna publicitat e es un autre parelh de margues.

  • 3
  • 0

Escriu un comentari sus aqueste article