Actualitats
Un referendum dins la Republica Sèrba que “menaça la sobeiranetat” de Bòsnia e Ercegovina
L’Union Europèa e los Estats Units s’opausan a un vòte tocant l’autoritat de la Cort de Bòsnia e Ercegovina sul territòri sèrbobosnian. Lo president de la Republica Sèrba (qu’es una partida de Bòsnia e Ercegovina) considèra que la Cort viòla l’independéncia judiciària sèrbobosniana. Russia demanda que s’ataque pas lo referendum, mas las consequéncias del malèsser sèrbobosnian.
L’Assemblada Nacionala de la Republica Sèrba (una entitat autonòma dins Bòsnia e Ercegovina), aprovèt dijòus passat la celebracion d’un referendum sus l’autoritat de la Cort e del ministèri public de Bòsnia e Ercegovina sul territòri sèrbobosnian. La decision es estada interpretada de part de l’Union Europèa e dels Estats Units coma una provocacion sèrbobosniana dins l’estat de Bòsnia e Ercegovina.
La Republica Sèrba, amb sa majoritat de populacion sèrbobosniana, es una de las doas entitats constituentas de Bòsnia e Ercegovina. L’autra es la Federacion, de majoritat bosniana e croata. Ambedoas an lor govèrn, lor parlament e lor sistèma judiciari pròpris.
Lo president de la Republica Sèrba e impulsor del referendum, Milorad Dodik, considèra que l’existéncia de la Cort de Bòsnia e Ercegovina es contrària als acòrdis de Dayton, qu’en 1995 serviguèron per metre lo ponch final a la guèrra de Bòsnia e per establir l’actuala estructura federala del país. Segon Dodik, Dayton prevei que lo sistèma judiciari deu èsser independent per caduna de las doas entitats constituentas.
En abril passat, Dodik aviá declarat que se se respectava pas l’autonomia de la Republica Sèrba e qie se la Cort de Bòsnia contunhava d’èsser operativa dins dos ans, en 2018 el convocariá un referendum d’independéncia.
L’Union Europèa e los Estats Units s’i opausan, Russia ditz qu’es un afar intèrne
Abans que l’Assemblada de la Republica Sèrba aprovèsse la celebracion del referendum, l’Union Europèa e los Estats Units avián emés un comunicat ensems que manifestavan lor “chepic” pel referendum e disián qu’aquel vòte entraïnariá “una menaça dirècta sus la sobeiranetat e la seguretat del país dins son ensemble”, una situacion que, çò dison, “se pòt pas tolerar”.
Per contra, Russia ditz que la controvèrsia es una question intèrna de Bòsnia e Ercegovina, e mai senhala qu’es plan conegut que los sèrbobosnians an de planhs tocant lo foncionament del sistèma judiciari. Segon los russes, caldriá resòlver l’origina d’aquel problèma e non pas atacar la consequéncia, valent a dire lo referendum.
Aquesta nòva es adaptada de Nationalia, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cresi pas que votar puga ser una causa dolenta. L'otan faguet la guerra contra Iugoslavia amb l'excusa que los bosnians musulmans eran en peril. Ara s'oposen a un referendum, que és una causa democràtica Los musulmans bosnis se son minoria, que tenguin son territori, però pas lo territòri dels cristians, car foren los musulmans que invadiren Serbia.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari