Un còp de mai comença l’Estivada, lo “festenal de las culturas occitanas”, que uèi e fins a dissabte nos amassarà e prepausarà las manifestacions culturalas de tot lo país, amb la participacion de totas las administracions que tòcan Occitània, de las regions fins a la Val d’Aran. Tornarmai, dins lo centre vila de Rodés, trobarem fins al grand empont las begudas, los taulièrs de las entrepresas e dels collectius del país e un fum de mond.
 
Delà los grops occitans de referéncia, gràcias a la convencion amb la Fièra Mediterranèa de Manresa, l’Estivada prepausa ongan las melhoras bandas dels Païses Catalans. Aital aurem ongan sus l’empont bèl los valencians Aspencat; tanben los valencians Zoo, que son venguts lo grop revelacion d’hip-hop dels Païses Catalans; i seràn los Doctors de Trobar de Lengadòc; lo Projecte Mut de las Illas Balearas; lo grop Dupain de Provença; los lengadocians de la Talvera; Guillaume Lopez e Du Bartàs; e los catalans Ebri Knight.
 
Dins las autras scènas podèm remarcar de cantairas coma Lisa o l’aranesa Alidé Sans que presentarà son primièr album.
 
L’Estivada prepausa pendent la jornada de cinèma en occitan, de literatura, de concèrts dins l’aprèsmiègjorn, de balètis un pauc mai tard per contunhar la fèsta a l’empont bèl e, per acabar, un concèrt suplementari a l’anfitratre o al Cabaret.
 
Cal remarcar lo vilatge occitan, amb de taulièrs de las principalas associacions occitanistas, e los principals mèdias occitanofòns. En mai de la television de l’Estivada, ESTV —menada per la còla de Dètz qu’es de mai en mai professionala—, lo festenal es seguit pels mèdias de la Federacion Interregionala dels Mèdias Occitans (FIMÒC). De son taulièr s’emetrà en dirècte cada jorn per ràdio.
 
 
Assemblada dels legeires de Jornalet
 
Jornalet convòca per lo primièr còp una “assemblada dels legeires”. Se tracta d’una reünion dobèrta ont lo capredactor del jornal en linha explicarà son trabalh de cada jorn, lo foncionament del mèdia, e escotarà totas las opinions dels legeires que participen a l’assemblada. La tòca es de metre en comun d’idèas e d’avises e marcar la linha de seguir.
 
Sèm conscients que lo prètzfach es grand e que las ressorsas son escarsas, mas esperam de rompre los clichats e los complèxes amb l’ajuda de totes. Sèm pas perfièches e es plan segur que fasèm d’errors. Esperam alavetz que nos ajudaretz a nos melhorar amb los vòstres comentaris, criticas e contribucions. Fasètz-vos vòstre lo Jornalet perque lo Jornalet es de totes.
 
L’assemblada aurà doas sesilhas. A Rodés serà lo 24 de julhet a 10h, e a Vilanuèva d’Òlt serà lo 20 d’agost a 17h15.
 
 
 
 
 
 

---

Podètz seguir l’Estivada sus Facebook, Twitter, e YouTube.
 
 
 
Clip de l’Estivada 2014