Bandièra01 1180x150: Comuna de Tolosa

Actualitats

La guèrra dels Le Pen: victòria judiciària del paire contra la filha

Dimars 28 de julhet, la Cort d’Apelacion de Versalhas a confirmat la suspension de la procedura de destitucion que l’a lançada l’FN (Front Nacional) per que Jean-Marie Le Pen siá pas pus president d’onor del partit d’extrèma drecha

| Rémi Noyon



Dins la guèrra dels Le Pen, lo paire Jean-Marie a ganhada una segonda batalha contra sa filha Marine. La Còrt d’Apelacion de Versalhas ven de confirmar lo jutjament del tribunal de granda instància de Nanterre del 8 de julhet: es cancelada la temptativa de destitucion de Jean-Marie Le Pen coma president d’onor de l’FN mejançant una consultacion dels militants per via postala. Desenant, nonmàs l’organizacion d’un congrès del partit ultranacionalista francés poiriá destituir lo lidèr d’extrèma drecha de sa foncion dins lo movement politic que fondèt en 1972.

Dins sos 88 ans, Jean-Marie Le Pen es famós per sas declaracions provocadoiras, sovent racistas, antisemitas o nostalgicas de l’epòca collaboracionista de l’estat francés amb l’Alemanha nazi. Totun, sa filha Marine, que li a succedit coma presidenta del partit despuèi 2011, a per tòca la conquèsta del poder en alargant la basa electorala de l’FN: per tant, las provocacions mediaticas de son paire contradison... frontalament son estrategia.

Lo 2 d’abril passat, quora Jean-Marie Le Pen afortiguèt dins una entrevista que pensava encara que las cambras de gas (dels camps d’extermini nazis) èran estadas “un detalh de l’istòria de la Segonda Guèrra Mondiala”, coma ja o aviá dich en 1987, sa filha decidiguèt de lo fòrabandir de l’FN. Lo vièlh cap neofaissista refusèt de s’excusar e mai declarèt, qualques jorns puèi, dins lo setmanièr d’extrèma drecha Rivarol (que deu son nom a Antòni Rivaròl, un occitan del sègle XVIII, celèbre per son accion politica monarquista antirevolucionària e per son elògi d’una pretenduda universalitat de la lenga francesa), que Philippe Pétain, cap del regim francés collaboracionista amb los nazis, èra pas jamai estat un traite.

Per tant, lo 4 de mai de 2015, lo burèu executiu de l’FN suspendèt Jean-Marie Le Pen de sa qualitat d’aderent e comencèt una procedura de consultacion postala dels militants per destituir lo fondador del partit de sa foncion de president d’onor. Aguèsse pas la justícia donat rason a Jean-Marie Le Pen, los resultats ne serián estats coneguts lo 10 de julhet.

La guèrra dels Le Pen a una consequéncia importanta en Occitània: Jean-Marie Le Pen voliá èsser candidat a la presidéncia de la region Provença-Alps-Còsta d’Azur, ont l’FN poiriá ganhar, mas i renoncièt en favor de sa felena Marion Maréchal-Le Pen, tanben neboda de Marine Le Pen. Tanben es possible que lo conflicte politicofamilial provòque de candidaturas dissidentas de fidèls al fondador del partit.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article