Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Es Volentaris d’Aran qu’organizaràn un an mès era Corsa des 15 Pòbles

Era corsa, qu’enguan celèbre era sua 19u edicion, se debanarà eth 30 d’agost e se reliarà damb bèri aspèctes deth hèt diferenciau occitan

Era conselhèra deth torisme e deth desvolopament economic deth govèrn d’Aran, Anna Díaz, e eth president des Volentaris d’Aran, Roberto Boya, an signat un an mès era convencion de collaboracion entà qu’es Volentaris d’Aran organizen era Corsa e Caminada des 15 Pòbles que se celebrarà eth dia 30 d’agost.
 
Era conselhèra, Anna Díaz, a manifestat qu’er engatjament deth govèrn aranés “ei promòir eveniments esportius ja consolidats qu’ath madeish temps, transmeten valors coma, en aguest cas, era conservacion deth patrimòni”.
 
Aguesta convencion establís qu’es Volentaris d’Aran introdusiràn en totes es comunicacions dera Corsa era marca “Val d’Aran Esséncia des Pirenèus”, era lengua oficiau serà er aranés e se reliarà era Corsa damb bèri aspèctes der hèt diferenciau occitan, tanben velharàn entà qu’era participacion aumente a respècte des darrères edicions e eth Conselh Generau d’Aran collaborarà ena difusion e sostendrà economicament era organizacion.
 
“Volentaris d’Aran consideram qu’era Corsa des 15 Pòbles ei fòrça importanta entath país tant a nivèu esportiu coma toristic e patrimoniau”, çò soslinhèc eth president des Volentaris d’Aran, Roberto Boya.
 
Era Corsa e Caminada des 15 Pòbles, qu’enguan celèbre era sua 19u edicion, a ua distància de 21 190 mètres çò que correspon a un percors de miei maraton. Eth desnivèu positiu dera corsa ei de 1300 mètres e eth negatiu ei de 1200.
 
De tot biais, eth percors compde damb tres opcions mès:
 
— Era caminada de 19 quilomètres damb 900 mètres de desnivèu positiu e 800 mètres de desnivèu negatiu.
 
—  Era caminada 5 quilomètres damb 100 mètres de desnivèu positiu e 200 mètres de desnivèu negatiu.
 
— Era Corsa Juvenila entàs neishudi ath delà de 1998 damb eth madeish percors qu’era Caminada de 5 quilomètres.
 
“Era Corsa des 15 Pòbles desvolope eth excursionisme ena Val d’Aran, atau coma permet gaudir d’ua rota de trekking combinada damb era visita pes pòbles d’Aran e, pr’amor dera sua elevada participacion, hè difusion dera Val d’Aran e ath delà collabòre ena diversitat des sasons deth torisme. Atau donques, aguesta corsa desenant hè partida deth patrimòni naturau e istoric dera Val d’Aran”, çò higec era conselhèra, Anna Díaz.
 
Mès informacion e inscripcions: www.corsa15pobles.org.
 
 
 
 
Conselh Generau d’Aran 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article