Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Se presente era CUP en Aran en tot soslinhar eth “potent imatge d’occitans e catalans amassa”

Era polemica pera non-autorizacion der acte ena plaça merquèc era presentacion

Se presentèc agèr en Vielha era Candidatura pera Unitat Populara-Crida Constituenta (CUP-CC) entàs eleccions que vien ath Parlament de Catalonha. Aperaquí 80 o 90 persones participèren en un eveniment marcat pera polemica. Protagonizèren er acte Antonio Baños, numèro 1 pera demarcacion de Barcelona; era aranesa Mireia Boya, numèro 2 pera demarcacion de Lhèida; e era palharesa Clara Barbal, qu’ei en numèro 4 d’aquera madeisha demarcacion.
 
 
“Es aranesi an de hèr eth sòn procès”
 
Baños arremerquèc eth caractèr plebiscitari des eleccions deth 27 de seteme que ven, en tot insistir ena "necessària sobeiranetat populara, era libertat de toti es pòbles e eth trencament institucionau, economic e patriarcau damb eth regim de 1978, eth der estat espanhòu, tanben present en Catalonha e en Aran". Tà Baños, es aranesi an de hèr eth sòn procès, en tot arremercar “eth potent imatge conjunt de Catalonha e Aran (Occitània), que se materializarie en ua futura Republica de Catalonha e Aran, o Aran e Catalonha, donques er ordre non ei important, mès òc eth hèt”.
 
Deth sòn costat, Boya defensèc era libertat d’expression en espaci public despús dera polemica damb era comuna de Vielha e arrebrembèc que, “entàs aranesi, ei ua oportunitat istorica e estrategica entà decidir eth sòn futur e qu’es eleccions an d’encentar un procès constituent, de debat seriós e informat, a on Aran decidisque. Ara ben, ei eth Parlament catalan qui a reconeishut er occitan coma lengua oficiau, a permetut recuperar es institucions istoriques e er autogovèrn e a metut eth dret ara autodeterminacion deth pòble aranés ena Lei d’Aran. Se ben tot ei melhorable, Aran a estat tostemps un pòble d’acuelhuda, dubèrt a toti, e era polemica damb era comuna sonque contribuís a hèr a créisher bèths estereotipes infondadi”, çò higèc, en tot excusar-se tanben deuant des pòqui toristes que i auie.
 
 
Un acte enebit pera comuna de Vielha-Mijaran
 
Era polícia autonomica catalana, es Mossos d’Esquadra, e era polícia locau de Vielha s’aprochèren entà “préner acte” pr’amor qu’era comuna non auie autorizat er eveniment. De hèt, era comuna de Vielha e Mijaran neguèc era permission de hèr era presentacion ena Plaça dera Glèisa, en tot prepausar emplaçaments alternatius. Eth consistòri argumentèc qu’er eveniment podie destorbar as toristes e planhec qu’era sollicitacion se hèc massa tard.
 
 
Polemica damb Unitat d’Aran
 
Mireia Boya assegurèc que sabec pes Mossos d’Esquadra era decision deth consistòri, que presidís Juan Antonio Serrano d’Unitat d’Aran, partit que hè part deth Partit des Socialistes de Catalonha (PSC-PSÒE). “Celebraram er acte egalaments, e ena Plaça dera Glèsia, coma ac auíem previst, pr’amor qu’aguesta proïbicion ei pur caciquisme e sequèstre era nòsta libertat e era nòsta dignitat”, çò auie avertut Boya. Segons era candidata aranesa, “en aquera plaça se hèn activitats de tota sòrta e non ei credible qu’un acte dera CUP pogue destorbar as toristes”.
 

Eth pròplèu dimenge 23, tàs 17 ores, eth candidat nº1 pera CUP Països Catalans, Antonio Baños, ven tà Vielha a hèr era...

Posted by Mireia Bo on divendres, 21 / agost / 2015

 
De son costat, eth president d’Unitat d’Aran, Francés Boya, critiquèc sus Facebook ara candidata aranesa d’ua manèra fòrça dura.
 

Resulte sorprenent er afan de notorietat dera q en diden "naua política".  Convertir era transparència en exibicionisme...

Posted by Paco Boya on dissabte, 22 / agost / 2015

 
 
 
 
FM/R

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
4.

Mas felicitations occitanas e independentistas a Mireia Boya per son trabalh coratjós e coerent en favor d'Aran e d'Occitània. Es trist qu'Unitat d'Aran seguisca la meteissa evolucion espanholista que lo PSC-PSOE.

Una granda amiga catalana miá, quand fasiá sos estudis, rescontrèt Paco Boya. Lo trobèt fòrça occitanista. Deviá èsser una autra epòca...

Totun, non còsta pas de comprene que los interèsses d'Aran e d'Occitània en general son pas de demorar dins un país, Espanha, cada dia mai centralista. Ja la pression del castelhan es fòrta sus l'aranés...

  • 16
  • 1
JF Blanc
3.

Tà toti es qui dobtàven de l'occitanitat d'Aran: son autan garrolhaires com es autes occitans :)

  • 13
  • 0
Pirolet
2.

Cada còp mai decebent lo Paco Boya.

  • 18
  • 1
Lo TèrmÒc
1.

Lo 99% d'occitans van pas tot compréner lo missatge de Francés Boya, benlèu. "Caspós" vòl dire "pelliculós". De "pellicula" qu'aicí vòl pas dire film, pellicula que vòl dire "escauma dera pèl del cran". "Caspós", se compren ara, es un adjectiu mespresant.
Pas gaire edificant, tot asomat.

  • 12
  • 0

Escriu un comentari sus aqueste article