Bandièra01 1180x150: Comuna de Tolosa

Actualitats

La montanha mai nauta dels Estats Units recupèra son nom indigèna

| Gregory "Slobirdr" Smith

Lo Mont McKinley passa a èsser conegut oficialament coma Mont Denali, après qualques decennis de controvèrsia. Lo govèrn d’Obama ditz qu’es una “reconeissença de las tradicions dels nadius d’Alaska”.


La montanha mai nauta dels Estats Units e de tota l’America del Nòrd recuperèt diluns passat son nom indigèna, Mont Denali, amb totes sos efièches juridics, après una disputa de plusors decennis. L’Ostal Blanc signèt la decision la setmana passada e l’anoncièt diluns, en coïncidissent amb una vesita del president Barack Obama en Alaska, l’estat ont se tròba la montanha.
 
Lo nom Denaliproven de la lenga del pòble koyukon, qu’abita dins la zòna situada al nòrd d’aquela montanha. Dins lenga koyukon, significa “la nauta”.
 
La montanha, de 6168 mètres, èra fins ara coneguda oficialament al nivèl federal coma mont McKinley, en onor d’un president estatsunidenc assassinat en 1901. L’estat d’Alaska, a travèrs del sieu Comitat dels Noms Geografics, aviá restituit la denominacion Denali coma nom oficial de la montanha en 1975, mas sonque al nivèl estatal. Al nivèl federal restava en vigor lo nom McKinley, e mai se lo Parlament d’Alaska aviá demandat a Washington qu’adoptèsse tanben Denali coma nom oficial de la montanha.
 
Ara, lo govèrn d’Obama a decidit de far lo pas de cambiar lo nom “en reconeissença de las tradicions dels nadius d’Alaska e del fòrt sosten de la part de la populacion d’Alaska”, segon çò que declarèt la secretària de l’interior, Sally Jewell. Segon lo recensament de 2010, lo 15% de la populacion d’Alaska es indigèna.
 
Al delà d’aquela reconeissença simbolica, s’espèra qu’aquesta meteissa setmana Obama anóncie de nòvas mesuras per ajudar los pòbles indigènas d’Alaska. Segon aquel rapòrt governamental, en 2009 lo 18% dels nadius d’Alaska vivián dejós lo lindal de la pauretat. Per contra, aquel percentatge dins la comunautat blanca èra del 5,5%. Los indigènas èran tanben lo grop amb mens de revenguts e amb mens de percentatge de graduats del segondari e de las universitats.
 
 
 
 

Aquesta nòva es adaptada de Nationalia amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
2.

Obama es bona persona, coma molts de presidents dels Demòcratas. Mas no n'hi ha hagut cap president bon del partit Republican, començant per Lincoln que tant han alabat las històrias oficialas dels eeuu, defensor dels interesos dels grans industrials del Nord que no volien pas que los paures estats del Sud poguesson vendre sas materias primeras a la Gran Bretanha,Holanda,França,... perquè tot lo negoci fos per els,e sas fabricas del Nord.

  • 1
  • 0
Pirolet
1.

E quora La Sala recuperarà son nom en luòc del colonialista "Decazeville" coma se nomenava Brazzaville, Philippeville, eca?

  • 4
  • 0

Escriu un comentari sus aqueste article