Los violets del TFC s'i poguèron atemar amb vam e determinacion, ne'n caliá mai per resistir als flamencs de Lilla. Lo primièr temps mai que mai mostrèt la febleltat dels garoneses, e la manca d'experiéncia de las partidas a enjòc naut. Los lilleses trantalhèron pas al moment de passar un penalti (Eden Hazard, de lo pas poder tenir arser) e un gòl (Dimitri Payet), e tornavan al vestiari sens aver esprovat cap d'esitacion. Ça que la, los tolosencs faguèron pròva après la pausa d'una polida volontat, amb un jòc sempre virat endavant. Aquelas bonas intencions foguèron premiadas al segond temps, que los tolosencs encarguèron lo jòc fins al gòl d'Aurier (60a minuta), que tornèt los espers als occitans. Mas arser, s'i podiá pas faire res contra los campions de França. A dètz contra onze per l'ultim quart d'ora, lo TFC capitèt pas de tornar al marcador, e manquèron quitament de veire la resulta mai desfavorabla encara. Al classament, pèrdon terrenh, e demoran pegats sieis punts darrièr Lilla.

 

Al revèrs de çò que's podiá preveire, l'OGC Niça capitèt lo bon còp de la dimenjada. Amb una fòrça mentala impressionanta (tornèron dos còps a la marca, après èstres estats menats), e una energia mantinguda fins al cap de l'encontre, los niçards s'impausèron finalament, al tèrmi d'una partida engatjada e incertana. L'albenassenc Anthony Mounier (set gòls aquela sason) inscriguèt un polit doblat, del pè e del cap, e balhèt la victòria finala a la còla provençala. Los Aglons quitan aital la zòna de relegacion, un punt dessús las tres darrièras plaças.

 

Aquela desfacha dels Verds a casa deviá ajudar los bordaleses a s'aprochar de las plaças europencas. Per poder encara esperar, los Girondins avián de prendre los tres punts. Mas èra sens comptar sus la motivacion irregulara de la còla marin e blanc. Demorèron incapables de marcar suls temps fòrts, d'imaginar solucions per passar lo blòc dijonés. Tremoulinas dobriguèt lo marcador, pr'aquò, per un penalti a 72a minuta. Mas encara un còp, a l'egal de las partidas contra Aiacciu e París, la còla bordalesa se perdèt en camin. Los dijoneses capitèron alavetz de tornar prendre la bala, fins al rampèl (90+1 minuta), sus una error de defensa de mai. L'Euròpa s'eslonha, a l'encòp que lo public vei grandir sas interrogacions sus una còla pauc concernida e incapabla de mestrejar una partida fins al cap.

 

La trentena jornada s'acabarà per l'opausicion entre Montpelhièr e Marselha, desplaçada a dimècres 11 d'abril pr'amor de la partida de Champions League dels marselheses a Munic, aquel dimarts. 

 

Sent Estève – Niça 2-3 ; Bordèu – Dijon 1-1 ; Lorient – Evian 0-1 ; Aussèrra – Valencianas 2-0 ; Sochaux – Brest 2-1 ; Nancí – París 2-1 ; Lilla – Tolosa 2-1 ;  Can - Aiacciu 0-0 ; Rennes – Lion 1-1