Bandièra01 1180x150: Comuna de Tolosa

Actualitats

La polícia ongresa emplega de gases lacrimogèns e un canon d’aiga contra los refugiats

Croàcia dobrís las pòrtas als refugiats e critica la repression ongresa, del temps qu’Ongria pensa de bastir una autra barralha sus la frontièra croata

La tension aumenta de mai en mai sus la frontièra entre Ongria e Serbia, a Roszke. La polícia ongresa a emplegat de gases lacrimogèns e un canon d’aiga contra los immigrants e refugiats qu’ensajan de passar la frontièra per arribar fins en Alemanha a travèrs d’Àustria.
 
Los refugiats e los immigrants se tròban darrièr la barralha que las autoritats ongresas an bastit per ne blocar lo passatge. La polícia ongresa a denonciat que i aviá d’immigrants “agressius” qu’an trencat la barralha e qu’an traversat la frontièra. Totun, un responsable de l’ÒNU sus plaça afirma que sembla pas que los refugiats ajan trencat res.
 
Qualques mèdias explican que qualques personas an lançat d’objèctes contra la polícia ongresa al dessús de la barralha. Los ferits se comptan per centenats.
 
 
Croàcia dobrís las pòrtas e ajuda
 
Aperaquí sièis mila refugiats son intrats los jorns passats en Croàcia, après lo barrament de la frontièra del costat d’Ongria. Las autoritats an mandat un tren a la frontièra de Serbia per menar los refugiats a de centres d’aculhença près de Zagrèb.
 
Ièr, dijòus, lo primèr ministre Zoran Milanović s’entrevistèt amb lo cancelièr austrian, Werner Faymann, per parlar de la crisi dels refugiats. Milanović assegurèt qu’acceptarián e que recebrián los migrants e que lor permetrián de contunhar lor viatge cap a d’autres païses.
 
Croàcia e Eslovenia reclaman la creacion d’un corredor umanitari per evitar de situacions inumanas coma la que se passa a la frontièra amb Ongria.
 
 
De criticas a Ongria
 
Amb Eslovènia, Croàcia reclama la creacion d’un corredor umanitari per evitar de situacions coma la que s’es passada a la frontièra ongresa.
 
De son costat, l’ÒNU a qualificat d’inacceptables los atacs de la polícia ongresa contra los refugiats sus la frontièra amb Serbia.
 
 
Budapèst criminaliza los refugiats
 
Per contra, lo govèrn de Budapèst criminaliza los refugiats. “Aquel mond son pas pacifics, vòlon pas solament traversar Ongria. Son perilhoses e aquel perilh s’es mes en evidéncia uèi. Se cresètz, vos, que los refugiats son pas armats e qu’atacaràn pas la polícia per ensajar d’intrar dins lo nòstre país? Ieu o cresi pas”, çò diguèt lo pòrtavotz del govèrn ongrés.
 
 
De son costat, Órban explica dins Le Figaro que pensa de bastir una autra barralha sus la frontièra amb Croàcia. Aquel plan es estat contestat pel primièr ministre croat. “Pensi que las barralhas e los murs arrestaràn pas degun. En aquel cas, s’es mandat, en plen sègle XXI, un messatge tarrible”, çò a assegurat Milanović.
 
 
D’asclas dins Schengen
 
Mentre que contunhan las discussions europèas per ensajar de resòlver la crisi umanitària dels refugiats, la dimenjada passada Alemanha reïnstaurèt los contraròtles frontalièrs eliminats per l’acòrdi de Schengen. D’autres païses, coma Eslovaquia, Àustria, Ongria o Olanda, an enduresit las inspeccions. En Ongria, lo primièr ministre Viktor Orbán promòu de contraròtles durs sus la frontièra exteriora de l’UE, ont de fach bastís una barralha e reprimís durament los que se’n sarran. En mai d’aquò, Orban a fach una lei per metre en preson las personas que passen illegalament la fontièra.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
7.

Ongria té un govern quasi d'extrema dreita. Per aquò fa faissistadas!

  • 1
  • 0
Peter Nollet Brussèlas
6.

#5 Del caumatge (avèm besonh d'una novèla resèrva de demandaires d'emplec pauc qualificats ?), de l'analfabetisme, d'una vision del monde medievala (plaça de la femna, asirança contra lus omosexuals, excision, drechs deus animals), de l'intolerància (vos rapelatz dels crestians que fuguèron gitats per dessús bòrd), de la violéncia (acceptacion quasi-generala de la violéncia contra lus infidèls), de l'infiltracion de mai de terroristas… Volètz d'autres exemples ?
Es vertat qu'i a pas d'ataca emb violéncia pel moment. Lus novèl arribats son evidentament contents d'èstre aculhits e de reçaure de l'ajuda. Mès a Brussèlas, lus integristas son desjà a recrutar de novèls combatants entremèg lus immigrats que se presenton aus oficis per damandar l'asil. I a nonmàs lus "padamalgam" que creson que son dins lo camp del Ben que vòlon pas veire la menaça.

  • 0
  • 0
Joan Rodés
5.

#4
Defendre la societat occidentala de qué?
Quina agression, quina ataca?
Çò que cal pas ausir...
Ieu trobi que cal pusleu defendre la societat occidentala de sa poiridura.

  • 0
  • 0
Peter Nollet Brussèlas
4.

Tuts lus país de l'espaci Schengen an lo deber de protegir las frontièras extèrnas de l'espaci. Lus adeptes de la ben-pensança condamnon Ongria, lo sol país que fai son deber per defendre la societat occidentala.

  • 1
  • 0
Tristis
3.

Esperi plan fòrt per vos qu'un d'aquels jorn, lo vòstre ostal peterà pas, los vòstres filhs e la vòstra dama emenats prisonièrs per d'òmes crusèls e sens pietat, e que vos retrobarètz pas sens fòc ni lòc sus la rota.
E se per astre un d'eles se trobarà de l'autre costat de la frontièra, espera que vos tendrà la man.

Paura França, paura Euròpa.

  • 3
  • 0

Escriu un comentari sus aqueste article