La tòca de l’associacion bailejada per Anna Brenon, Joan-Loís Gasc e Alan Roch es d’organizar de rescontres e de discussions entre mond d’univèrses diferents (istorians, etnològs, creators, escrivans…) a l’entorn de qualques tèmas d’istòria e de ne veire los ligams e enjòcs per la societat d’ara.
 
Lo dissabte de matin, son dos occitanistas plan coneguts que dobriràn la jornada: Danièl Loddo (la Talvera) que parlarà de supersticions en país tarnés e Micheu Chapduelh qu’abordarà la question dels rites e formulas magics en Peiregòrd. De vèspre, Anna Brenon parlarà d’un endevinaire de la Montanha Negra als tempses inquisitorials; l’universitari catalan Pau Castell evocarà la caça de las bruèissas en Lengadòc e Catalonha al sègle XV; Ànnia Cazenave clavarà las intervencions en parlant de filtres e d’encantaments. Una discussion dobèrta se tendrà entre auditòri e intervenents.
 
La participacion a la discussion es gratuita. Lo dinnar de miègjorn còsta 15 èiros (se marcar al prèp d’ostal.sirventes@... en precisant se volètz un repais amb carn o vegetarian, preparat per la valenta associacion locala l’Abribus).
 
Las comunicacions de la jornada seràn represas sul blòg de l’associacion.
 
Es de notar que Micheu Chapduelh parlarà de literatura lo dijòus 1r d’octobre a Carcassona (Ostal Sirventés, 18h30) per clavar los 5 Dijòus-Escritura. Divendres, aprèp un rescontre amb los calandrons de Ciutat, animarà un moment de conte, la Fada Multicarta, a la galariá La Marge-Atelier de Serviés del Val.
 
La manifestacion venenta dels Companhs de Paratge serà una presentacion de tres voses del debanament e de las consequéncias del Concili de Latran de 1215. Las intervencions se faràn a Fanjaus lo divendres 13 de novembre.
 
 
 
 
Mirèlha Braç