Bandièra01 1180x150: Comuna de Tolosa

Actualitats

Krzysztof Charamsa, lo prelat omosexual qu’a fach tremolar lo Vatican

A declarat son omosexualitat e a presentat son companh sentimental durant la velha de l’inauguracion del Sinòde dels Evesques sus la familha

Krzysztof Charamsa, de 43 ans, es un oficial de la Congregacion per la Doctrina de la Fe, l’institucion responsabla dels afars de la fe de la Glèisa Catolica, e mai es secretari adjonch de la Comission Teologica Internacionala del Vatican e professor a la Pontifícia Universitat Gregoriana de Roma. Charamsa a fach tremolar lo Vatican quand, lo jorn abans l’inauguracion del Sinòde dels Evesques sus la familha, se declarèt dobèrtament omosexual e i presentèt lo sieu amorós, qu’es catalan e qu’a nom Eduard.
 
“Soi un prèire omosexual, aürós e fièr de ma pròpria identitat”, çò diguèt Charamsa, qu’amb son prestigi coma cercaire en teologia apondèt e mai qu’a pas trobat dins cap de tèxt de la Bíblia cap de justificacion per l’omofobia vaticana.
 
La reaccion del Vatican es estada immediata e li es estat enebit d’exercir dins sa carga tant d’ensenhaire coma de gerent dins l’estat del papa. Aquela actitud a generat de fòrtas criticas sustot en Itàlia, per comparason amb lo laxisme e mai la complasença que lo Vatican a mostrat amb los acusats de pederastia.
 
 
Amic de Catalonha e del drech d’autodeterminacion
 
Fa qualques setmanas Charamsa foguèt entrevistat a Catalonha Ràdio e declarèt que “la doctrina sociala de la Glèisa defend lo drech a l’autodeterminacion dels pòbles”. En aquela entrevista expliquèt que partejava los desirs del mond que volián votar democraticament “per un futur melhor per lor país” e defendèt que lo “drech d’autodeterminacion d’una nacion es un dels dreches de l’òme”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan-Marc LECLERCQ
1.

E la "Congregacion per la Doctrina de la Fe" es pas la seguida d'una institucion que's sonava "Inquisicion" ?

  • 7
  • 0

Escriu un comentari sus aqueste article