Bandièra01 1180x150: Comuna de Tolosa

Actualitats

Rugbi XIII: NRL, lo punt d’aur pels Vaquièrs

Los Vaquièrs de North Queensland ganhan la “Grand Final NRL”. L’eròi de la finala, Jonathan Thurston, ponh levat, es just a dreita del trofèu
Los Vaquièrs de North Queensland ganhan la “Grand Final NRL”. L’eròi de la finala, Jonathan Thurston, ponh levat, es just a dreita del trofèu
Una fin de setmana tretzista de tria per aqueles qu’an pas paur de sentir patacar coma una batucada lor còr!
 
 
NRL: Thurston, rei d’Austràlia
 
Queensland s’èra desplaçat en massa a Sydney, malgrat los cambiaments d’ora e la montada subita dels prèses d’avion!!! Los Broncos èran los primièrs en accion: passavan una penalitat per Parker (6a) e marcavan un ensag per Corey Oates (transformat per Parker a la 7a): 8-0. Mas los Vaquièrs replicavan tre la 10a amb un ensag de Justin O’Neill (transformacion: Thurston) abans de prene l’avantatge per James Tamou (transformacion Thurston, a la 25a): 12-8. A la 34a minuta, Thurston perdiá (o se fasiá arrancar?) una palma que Jake Reed transformava en ensag (transformat per Kahu). Atal, a la pausa, los Broncos menavan 14-12.
 
A la represa, ajustavan una penalitat per Kahu e la marca anava demorar atal 16-12 pendent quasi 40 minutas. Las atacas dels Vaquièrs se trucavan a la cortina defensiva de Brisbane, la palma cremava las mans a de moments decisius e Brisbane se lançava dins la gestion del jòc. Mas, sul darrièr balon e aprèp lo cinquen tengut, Thurston reversava lo jòc e Morgan d’una chistèra mandava l’alièr Feldt puntar dins lo canton mentre que la còrna restontissiá. Thurston preniá tot son temps per ensacar la transformacion de la victòria, la palma preniá la bona direccion, mas trucava los pals. Ne caliá venir a la prolongacion. Lo mesclanha de Brisbane Hunt mancava la recepcion de la palma d’engatjament. Los Violets retardavan la conclusion en montant coma de fadurlas sus Thurston que podiá pas temptar lo tombat sus la sortida de mesclanha, mas sul quatren tengut, lo dobertura dels Vaquièrs tustèt lo tombat victoriós: 17-16. S’èra plan meritat d’anar brandir lo trofèu amb sos collègas!
 
 
Superliga: Wigan-Leeds en finala
 
En Superliga, dijòus, Wigan se ganhèt la plaça en finala en dominant los Gigants d’Huddersfield 32-8. Divendres, la partida foguèt mai indecisa, mas Leeds finiguèt que faguèt plegar los campions sortents de Saint Helens: 20-13 http://www.superleague.co.uk/report/12048 . L’aficha de dissabte a Old Trafford (7 oras del vèspre, ora occitana) serà doncas Wigan-Leeds. Los Rinocèros ensajaràn de se ganhar lo doblat per saludar las retiradas de las pelenas tretzistas de Sinfield e Peacock.
 
Dissabte, en barratge, los Gats Fèrs de Wakefield se gardèron la plaça en Superliga fàcia als Braus de Bradford: 24-16.
 
 
Elèit: Palau, mèstre de Catalonha
 
Se Tolosa fàcia a Avinhon (44-9), Carcassona a Albi (40-20) e Lesinhan al Molin amb un 72-10 passat a Vilanuèva coneguèron gaire de dificultats per s’impausar, tot autra foguèt la batèsta catalana a Sant Estève entre Dragonets e Palau. E, suspresa, la victòria revenguèt als vesitaires: 28-16.
 
Dissabte, Avinhon recebrà Lesinhan (17h), Tolosa jogarà a Carcassona (18h45) e los Dragonets a Vilanuèva (20 h). Dimenge, a l’Agulha, Limós recebrà Albi (15h30).
 
Diluns 12, los jogaires retenguts per representar los Blaus en campionat europèu se recamparàn per preparar la recepcion d’Irlanda a Albi lo dissabte 17 d’octòbre .
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article