Bandièra01 1180x150: Comuna de Tolosa

Actualitats

Passos Coelho torna ganhar l’eleccion en Portugal malgrat l’austeritat

La coalicion de centredrecha s’impausa als socialistas en las eleccions legislativas

Malgrat las retalhadas e las politicas d’austeritat, l’actual primièr ministre de Portugal, Pedro Passos Coelho, obtenguèt una clara victòria electorala a las eleccions legislativas d’aqueste dimenge passat. La coalicion de centredrecha del PSD-CDS que Coelho dirigís a atench lo 37% dels vòtes, fòrça mai que lo principal partit opausant, lo Partit Socialista, qu’a obtengut un pauc mai del 32% dels vòtes. Los responsables de la coalicion Portugal Endavant proclamèron sul pic la victòria, e mai s’an pas pogut aténher la majoritat absoluda, que requerís lo 45% dels sufragis.
 
Darrièr los socialistas d’António Costa, son demorats lo Blòc d’Esquèrra, amb lo 8,5% dels vòtes, e lo Partit Comunista de Portugal, amb lo 6,8%.
 
La victòria de Passos Coelho a d’importància delà Portugal pr’amor qu’es lo primièr dirigent d’un estat europèu qu’a gardat lo poder après aver aplicat las mesuras d’austeritat impausadas per la tròica. Encara mai: Passos Coelho s’èra manifestat opausat a tot tipe de remesa del deute grèc, e a contunhat de defendre lo besonh de las politicas d’austeritat, que pendent la campanha a pas dich qu’èran acabadas, mas que se relaxarián.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article