La lenga fiulada de Bearn ara s’ensenha a l’Universitat de Pau. Dimècres se n’inaugurèt lo cors en carga del professor d’occitan Felip Biu, segon çò que rapòrta La République des Pyrenées. Dins aquela primièra session que comptava amb un cinquantenat d’autitors, s’esperava la preséncia del cercaire Guy Busnèl, de 100 ans d’edat, qu’aviá menat lo primièr estudi sus la lenga fiulada al començament dels ans 1950, mas poguèt pas participar per de rasons de santat.
 
Aquela practica qu’a pena se conservava en la Val d’Aussau s’ensenhava ja al collègi de Laruns. Lo foncionament es exactament parièr al d’autras lengas fiuladas d’autras culturas, coma lo de l’illa de la Gomera (Canàrias), ont es una practica viva e ensenhada dins las escòlas. Se tracta de fiular de modulacions sonòras de las sillabas. De fach en Bearn son venguts de professors de las Illas Canàrias per n’ajudar a la recuperacion.