Bandièra01 1180x150: Comuna de Tolosa

Actualitats

Copa dau Mond de rugbi: la fasa finala comença

| rugbyworldcup.com
Los quarts de finalas de la Copa dau Mond de rugbi començan questa dimenjada. Fasèm lo ponch sus la fin de las fasas qualificativas e sus las partidas avenidoiras.
 
 
Grop A: Austràlia primiera e País de Galas segond
 
La partida entre Austràlia e lo País de Galas èra decisiva per lo classament finau dau grop. Los Wallabies ganhèron 15 a 6. Deguèron resistir pendent 12 minutas a la pression galesa, adonc, qu’èran en inferioritat numerica 13 a 15. Se’n remetèron au còp de pè de lor obreire Bernard Foley que marquèt los 15 ponchs de la partida.
 
Los anglés s’impausèron larjament contra los uruguaians 60 a 3 que tenguèron la primiera meitat davant de flaquejar. Qu’èra la darriera partida dau XV de la Ròsa dins la competicion ça que la.
 
 
Grop B: Escòcia qualificada de justesa
 
Los samoans auràn fach tremolar lo XV dau chardon e raivar los japonés. Mas lor indisciplina lor costèt la victòria e perdèron 33 a 36.
 
Los nipons, ilhs, ganhèron 28 a 18 fàcia aus Estats Units e mai las Aglas americanas fuguèsson valorosas. Qu’es la tresesma victòria per ilhs dins la competicion, çò qu’es istoric. E mai se o son ja, coma nacion organizaira, se serián qualificats per lo mondiau que ven mercés a lor tresesma plaça au classament.
 
 
Grop C: Blacks e Pumas prèsts per la seguda
 
Los Blacks ganhèron fàcia aus tongans 47 a 9 e mai lor juec fuguèsse un pauc confús. Metèron 50 minutas a s’impausar mas balhèron pas fòrça ocasions de marcar a lors adversaris que finiguèron que laschèron.
 
Argentina afichèt una brava qualitat de juec, mai que mai a la man, en marcar 9 eissais e batre Namibia 64 a 19.
 
 
Grop D: Irlanda primiera e favorida
 
Itàlia bat Romania 32 a 22, en far la diferéncia en primiera meitat e en assegurar lor victòria dins la segonda. Los Jarrics, bons dins las fasas ofensivas, se desrevelhèron dins la darriera mieja ora.
 
França pèrd 9 a 24 fàcia a Irlanda. Los Blaus faguèron tròp de fautas e los cèltas lor laissèron pauc d’oportunitats de marcar.
 
 
Los quarts de finala
 
Los quarts de finala se debanan questa dimenjada. Dissabte, l’Africa dau Sud jugarà contra lo País de Galas e la Nuòva Zelanda contra França. A veire las fasas qualificativas, los Blaus parton pas favorits dins quela partida. Los galés, ilhs, deuràn blocar daus Boks que fan que ganhar per oblidar lor desfacha fàcia a Japon.
 
Dimenge, Austràlia se confrontarà a Escòcia, pas favorida tanpauc, e Irlanda a Argentina. Quela darriera partida sembla fòrça dubèrta emb daus pumas en ascencion e daus cèltas melhor esquipa europèa.
 
 
 
 
Maime Caillon

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article