Bandièra01 1180x150: Comuna de Tolosa

Actualitats

Euròpa e Russia vòlon anar a la Luna

L’UE e Russia se preparan per colonizar lo satellit e n’esplechar las ressorsas mineralas

| Gustaaf Prins
Los europèus e los russes se preparan per enviar una nau a la Luna lèu. Serà una mission que prepararà l’eventuala colonizacion del satellit de la Tèrra. La nau espaciala que s’enviarà dins cinc ans dirà ont trobar d’aiga e de materials divèrses per crear d’oxigèn e de matèrias primièras. La mission s’apelarà Luna 27 e sortirà de la Tèrra en 2020.
 
“Avèm de tornar, plan segur, a la Luna”, çò diguèt Bérengère Houdou, cap del Grop d’Exploracion Lunar Europèu. “Aqueste sègle serà lo sègle ont i aurà de vilas umanas sus la Luna e lo nòstre continent tanben i vòl participar. Mas ara devèm collaborar amb los nòstres collègas internacionals”.
 
Aital, las primièras missions seràn roboticas. Luna 27 aurà d’arribar a aquel satellit, e mai exactament al sieu Pòl Nòrd. Coma es un luòc plan escur, tanben se pensa que se i pòt trobar d’aiga, de glaç e d’autres produches quimics qu’ajudarián los umans dins lor vida vidanta sus la Luna.
 
Es ara que s’es descobèrt que i pòt aver d’aiga e tanben d’autres minerals, la corsa espaciala que comença. Se los russes e los europèus non i arriban pas primièrs, seràn los chineses qu’o faràn. Las naus amb de robòts poirián preparar de viatges umans ja en 2030. De fach, los chineses ja pensan de dobrir de minas lunaras per aver d’èli 3. Aquò explica l’interès de l’Agéncia Espaciala Europèa (ÈSA).
 
 
Un luòc amb fòrça profièches comercials
 
Amb l’uèlh mes sus aquela sòrta de minerals, los europèus pensan ja de bastir de vilas umanas sus lo satellit de la Tèrra. “Seriá bon per l’observacion astronomica, per utilizar divèrses minerals e tanben d’autras ressorsas, e mai coma una basa per los cosmonautas qu’anaràn pus tard vèrs Mart”, çò confirmèt lo professor rus Mitrofanov, de la còla scientifica que collabòra amb l’ÈSA europèa.
 
Per tant, los de l’Agéncia Espaciala Europèa (ÈSA), en collaboracion amb de scientifics russes, preparan un nòu tipe de nau amb un sistèma de viatge plan avançat apelat Pilot que decidirà quin es lo melhor luòc per aterrar sus la Luna. E donc lo Pòl Nòrd lunar es estat causit coma un luòc ideal. Que farà mai aisida la subrevivença dels cosmonautas.
 
E mai, l’Agéncia Espaciala Europèa tanben bastirà lo laboratori miniaturizat apelat ProsPA. Serà preparat per trobar los melhors materials qu’amb eles se poirà extraire d’aiga, d’oxigèn e de carburant per las naus espacialas. Lor mission serà de trobar jos la superfícia lunara aquela sòrta de materials e, se se pòt, de ne far l’extraccion.
 
Totas aquelas missions, que per ara las an pas fachas publicas, auràn encara d’èsser aprovadas per lo Conselh dels Ministres de l’UE en 2016. Un còp fach aquò, çò dison los scientifics, serà solament una question de temps e pro. Totes los estats de la Tèrra començan de veire clar que i a plan de minerals dins la Luna e que se pòdon obténer d’un biais relativament aisit. E qu’o fagan l’Union Europèa, los russes o los chineses es, coma eles dison, sonque una question de temps. L’òme del futur sembla que tanben demorarà sus la Luna.
 
 
 
 
Christian Andreu

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
4.

Vols dir que ja no hi som?
"Tàrrega"

  • 2
  • 0
Jiròni B. Limòtges
3.

Fai bien beucòp de sòus metuts dins l'espaci en luòc de iò fotre aqui sur Tèrra, essaiar de sauvar çò que n'am pas enquera consumar... Que raibessen de calhaus e de mineraus gris e freges, me, vese nòstra tèrra sos aubres, sos rius e sos abitants. E me balhen la nhac de far de las chausas sens trauchar los nibles.

  • 3
  • 0
francesc palma de mallorca
2.

Es una bona pensada e sustot que sian l'UE e Russia. Cal invertir en l'espaci de manera cientifica, pas militara. E los vols són pas cars, costa cada un coma far una bona pel·licula, pas mai. Lo que passa es que los eeuu varen haver de tornar de quatres a tota maquina, perquè los encalçaven los ET. Mas aquestes d'ara segurament tendran unas altras intencions mai altruïstas, e miraran mai per la ciència.

  • 3
  • 0
Pirolet
1.

I pòdon totjorn anar mas lor caldrà tanben pensar a tocar de pès a tèrra, que i a de trabalh de faire aquí encara!

  • 6
  • 0

Escriu un comentari sus aqueste article